Aruba Tourism Authority: Aruba lo conta cu vuelo adicional for di Newark cu e aerolinea Jetblue

Diasabra ultimo den oranan di atardi a tuma luga e vuelo inaugural for di Newark Liberty International Airport. E aerolinea Jetblue a extende su servicionan cu e ruta nobo aki cu ta un di e cuatro rutanan cu lo wordo opera cu e Airbus A320 ofreciendo e Mint service.

Jetblue desde 2006 ta un socio importante y strategico pa cu crecemento di Aruba su turismo cu diferente gateways for di Merca pa Aruba unda nos isla ta un di e destinacionnan clave. Durante 2019, Jetblue a trece un total di 254.635 pasahero pa nos destinacion, cu ta 22.8% di tur bishitantenan pa Aruba. Cu esey nan ta un di e aerolineanan cu ta transporta mas hopi turista pa nos isla. Entre e lunanan di juli pa october 2020 por menciona cu Jetblue a trece un total di 16.850 pasahero pa Aruba cu ta alrededor di 21.5% di e total di “marketshare”pa e lunanan y a menciona.

“Durante e crisis debi na e pandemia aki ta momentonan cu mas nos ta aprecia e apoyo di nos socionan y ta agradecido cu Jetblue a identifica Aruba como un mercado cu potencial pa demanda. Aruba Tourism Authority y socionan sigur ta trahando rigurosamente pa reconstrui nos industria di turismo. Un di nos metanan principal ta pa sigura capacidad aereo y lo sigui haci nos maximo esfuerso pa Aruba sigui wordo posiciona como un di e destinacionnan preferi pa turistanan for di Norte America” CEO di Aruba Tourism Autohrity – Ronella TjinAsjoe Croes a comenta.

E vuelo adicional aki sigur lo contribui na e demanda cu tin for di e estado di New York y New Jersey cu ta e estadonan mas importante pa cu e mercado di Merca. Manera ta conoci e estadonan aki consistentemente ta estadonan cu “market share” di mas halto pa cu e mercado di Merca cu ta alrededor di 32% den 2019 y 34% den 2020. E vuelo adicional conhuntamente cu e opcion di Vault test cu a wordo introduci algun siman pasa lo sigur contribui na haci Aruba un destinacion mas atractivo y sin duda lo pusha demanda pa nos isla.

Pa medio di esaki kier a felicita socionan y comunidad den general cu e logro grandi aki pa cu Aruba. Nos tur mester ta orguyoso pa cu e confiansa brinda na nos isla specialmente den e momentonan aki cu mundo henter ta pasando aden. Tambe kier a gradici Ministerio di Turismo, Aruba Airport Authority, AHATA, representantenan internacional y local di Jetblue pa tur e esfuersonan haci pa e gran logro aki pa Aruba.

###