E necesidad financiero di Aruba ta keda grandi y sin un acuerdo, Prome Minister Evelyn Wever Croes ta bisa cu Aruba lo haci prestamo sin intervencion di Hulanda. E motibo ta pa Gobierno e condicionnan cu Hulanda ta mara na e sosten di likides ta negativo pa Aruba. Bon Dia Aruba a ricibi e condicionnan aki formula pa Ministerio pa Asuntonan Interior y Relacion di Reino, y nan ta describi como lo siguiente:

OHH

E condicionnan pa e di tres tranche di sosten di likidez ta parti den condicionnan generico y otronan adicional, cu ta specifico pa Aruba. Den e caso aki, Gobierno Hulandes ta pidi Aruba, basa riba articulo 38 inciso 2 di Statuut, pa aproba e contenido di e proposicion di e rijkswet Organo pa Reforma y Recuperacion y cu ta manda esaki pa conseho na Raad van State. E rijkswet aki ta percura pa e creacion di e organo, cu tin como meta pa na bienestar di pueblo di Aruba, promove reformanan na nivel administrativo, realisa finanzas publico sostenibel y reforsa resiliencia economico. Aki ta inclui creacion di e leynan constitucional cu ta necesario pa logra tur obhetivonan aki.

Manera ta conoci OHH ta un organo di maneho cu tareanan independiente y autoridad, dirigi pa ley Hulandes. Su tarea ta sostene y supervisa desaroyo y ehecucion di proyectonan y medidanan di organonan di gobierno y companianan di utilidad di Aruba.

E proyectonan y medidanan ta describi den liñanan grandi den un landspakket. Esaki ta un pakete coherente unda ta inclui pasonan concreto a corte tempo y reforma structural pa un tempo mas largo cu ta necesario pa haci Aruba resiliente. E pakete di pais ta haya su forma como un palabracion entre Hulanda y Aruba.

E lo ta e base riba cua Hulanda y Aruba lo traha hunto den e proximo añanan. Hulanda ta conta cu Aruba lo aproba e pakete aki y traha riba e definicion di e pakete aki den un agenda di ehecucion y planificacion di implementacion. E progreso di ehecucion di e pakete di e pais y e agendanan cu ta sali di dje, ademas di e plan di implementacion ta condicionnan pa e siguiente tranchenan di sosten financiero.

Banda di e OHH, tambe ta pidi Aruba pa bay de acuerdo cu e rijkswet di supervision financiero, cu ta pasa e areglo di supervision actual na nivel di reino, unda tin algun agregacion y cambio.

Mas sosten

Unabez Aruba cumpli cu e condicionan di e di dos tranche y bay de acuerdo cu e condicionnan di e tres tranche, cu ta inclui e sosten di likides necesario, lo bin na remarke di mas sosten di Hulanda. E OHH tin e tarea pa sostene e reformanan palabra, por ehempel, pa medio di pone experticio y capacidad na disposicion. Banda di esey OHH por inicia, promove y ehecuta proyectonan independiente, ademas di duna subsidionan na ciudadano y companianan, incluso companianan di Gobierno. Tambe lo por participa den e accionnan di capital di e companianan aki, pa asina nan por sostene e programanan di reforme. Nan por referi entre otro na temanan di estado di derecho, cuido y enseñansa. Mester tin un acercamento progresivo, reparti den fasenan cla, relaciona cu e agenda di ehecucion y segun e capacidad actual di Aruba pa realisa esakinan. Den principio lo mester busca cobertura di e reformanan for di e presupuesto di Aruba mes. E punto di salida pa e inversionnan aki ta cu esakinan, a termino, lo paga pa nan mes, pasobra nan ta contribui na mehoracion di e capacidad di entrada di Aruba, ademas cu ta baha e gastonan publico. Mas ainda, e organo mes por uza su presupuesto pa duna sosten adicional na proyectonan di reforma. Lo mira cada proposicion basa riba kico kier y con realisabel e ta. Medionan necesario por bin den forma di un prestamo, regalo, co-financiamento y/of un contribucion cu departamentonan lo por pone disponibel. E disponibilidad di e fondonan y procesamento presupuestario mester sosode basa riba e palabracionnan den e pakete di pais, e agenda di ehecucion, despues cu a yega na un decision politico.

Finalmente, Gobierno Hulandes ta considera di gran balor cu ta sigui sostene esnan mas vulnerabel den sociedad tanten cu esaki ta necesario. Repartimento di ayudo di cuminda lo continua en todo caso te fin di 2020.

Condicionnan specifico Aruba.

Den e proposicion manda pa Secretario di Estado Raymond Knops na Gobierno, e ta bisa cu Aruba mester bay de acuerdo riba contenido y presentacion pa conseho na Raad van State pa di e proposicion di e Rijkswet Organo pa Rerforma y Recuperacion y haci tur locual ta necesario pa su realisacion. E creacion di e rijkswet aki ta condicion pa siguiente tranchenan di sosten di likides.

Como tal, mester bay de acuerdo cu e rijkswet Aruba Financieel Toezich, RAFT. Den e documentonan a pone cu si a acepta e condicionnan di e landspakket pa 11 di September, lo mester a busca un sosten amplio di Parlamento pa 15 di November pa mas laat. E forma bou cua e acuerdo di landspakket haya e sosten amplio ta mara na e siguiente tranchenan di sosten di likides.

Tambe mester acorda cu e ahustacion y proposicion di e RAFT, cu ta bay keda agrega segun e trayecto di legislacion ta cana su caminda. E ahustacionnan aki en todo caso ta inclui posibilidad di sancion, dunamento di informacion di y pa CAFT, un papel di conseho di CAFT riba escogencianan pa loke na maneho, determina e trapinan di escalacion pa yega na un asina yama aanwijzing (KB), reglanan di presupuesto conforme e protocol cu Aruba a firma pa 2019-2021, y normanan adicional pa maneho financiero y gasto di interes. Hulanda ta involvi Aruba na momento di formula e proposicionnan pa e cambionan. Aruba mes lo contribui activamente na e creacion agenda di ehecucion di e landspakket pa Aruba, bou guia di e grupo di trabou temporario di Ministerio pa Asuntonan Interior y otro departamentonan di Hulanda. Esaki mester sosode pa 1 di December 2020.

Aruba lo traha activamente na duna un instruccion prome cu 15 di November 2020, pa loke ta e revision di e sector financiero pa medio di un partido externo independiente; un revision integral di e structura di supervision (leynan, regulacion y maneho di supervision ) riba mercadonan financiero pa medio di un partido externo independiente. Mas sosten di likides ta depende di con e trabou aki ta progresa.

Aruba lo mester duna prome cu 15 di November un bista di cua leynan lo mester keda adapta pa mitiga buraconan presupuestario. Esaki den cuadro di reforsa e ley y reglanan pa e sector financiero, y ta inclui en todo caso e asina yama DepositoGarantieStelsel, DGS ( Structura di Garantia di Deposito) y modernisacion di e cuadro di resolucion.

Aruba lo duna transparencia de inmediato y oido na tur peticion di CAFT pa loke ta informacion relaciona cu entidadnan di Gobierno

E plan di ehecucion den concepto pa revision di e sistema di enseñansa lo mester keda presenta na e Ministernan di Enseñansa di Hulanda y Aruba, y keda determina pa 1 di December 2020.

Aruba lo percura pa continuidad di procesonan vital, entre otro coriente y awa, internet y servicionan di data, provision di productonan petrolero necesario, trafico di pago, maneho di aviacion civil y tambe di trafico marino, servicionan di ayudo y e comunicacion entre nan, ademas di instancianan medico.

Den interes di stabilidad di orden publico y siguridad, lo no introduci cortamento di gasto den e capacidad di ehecucion di e sectornan mas vital di e estado di derecho, manera polis, duane, landsrecherche, Ministerio Publico, Corte, Kustwacht, prison y servicio di siguridad.

Condicionnan pa e di tres tranche

Locual tabata inaceptabel pa Prome Minister Evelyn Wever Croes ta e hecho cu el a considera cu Hulanda a bin cu condicionnan adicional pa e di tres tranche di 204 miyon florin. Mester bisa cu den e propio documentonan cu Raymond Knops a manda ta bisa cu e sosten di likides di 204 miyon ta awor conta pa e periodo di Juli 1 te cu 30 di November, pero unicamente si Aruba cumpli cu e condicionnan generico menciona caba, pero tambe condicionnan specifico pa Aruba.

Si Aruba bay de acuerdo y haci un peticion pa cumpli cu su obligacionnan regular di e pago di debenan, cu ta e sumanan principal na 2021 y 2022 bou di e Financiamento Externo di Dollar, Hulanda lo yuda Aruba cu e pagonan a cambio di un interes di dos porciento. Te awor a compromete na dos aña. Ta trata di prestamonan cu Aruba mester paga na 2021 di un balor di 177 miyon florin, y 346 miyon florin na 2022. E prestamonan aki ta na dos porciento y tin un duracion di siete porciento y mester paga cada seis luna despues di dos aña. Di e forma aki Aruba ta realisa un reduccion di gasto di interes di 82 miyon florin compara si haci prestamo riba mercado.

Si Aruba cumpli cu tur condicion pa 15 di November, si ta necesario, lo por bin sosten di likides adicional te cu 31 di December 2020, basa riba conseho di CAFT.

Pa motibo di e complexidad paloke ta maximalisacion di e top salarionan, cu ta te 130% di e salario di Prome Minister, a duna Aruba extension te cu 1 di october 2020, pa Parlamento entrega un proposicion aproba pa Parlamento na CAFT. E proposicion mester inclui un termino di transicion di maximo dos aña pa e contractonan actual. Te ora cu e areglo aki ta aproba pa Parlamento y durante e periodo di transicion pa contractonan existente, lo mester pone e maximo esfuerso na nivel di palabracion administrativo. E elemento aki ta mara na e decision pa un di cuater sosten di likides.

Aruba ta percura cu den cuadro di e Protocol Recherchesamenwerking revisa y bou supervision local, cu e ekipo di RST lo haya autoridad investigativo prome cu 15 di November. Tambe Aruba lo percura cu RST, Kustwacht, Landsrecherche y Koninklijke Marechaussee por haci nan investigacionnan independiente pa e mesun fecha aki.

Aruba lo percura pa cambio di e ley Admision Expulsion prome cu 15 di october, pa asina permiti miembronan di famia di ambtenaarnan di Reino cu ta mester bin traha na Aruba (hueznan, fiscal y otro) haya estadia automatico (awor tur mester haci peticion di estadia na DIMAS).

E prestamo ta den forma di bullet, cu e mesun fecha di expiracion manera e prestamo di e otro tranchenan, paga den dollar Mericano.

Procedura di e pago di e sosten di likides

Lo manda e acuerdo di prestamo firma despues di e decision definitivo di Conseho di Minister di Reino na Minister di Finanzas y tambe Minister Presidente di Aruba. Minister di Finanzas lo mester debolbe e acuerdo firma denter di dos dia na e Secretario di Estado di Asuntonan di Reino, Raymond Knops, pa asina despues di tres dia por manda e placa Aruba pa medio di Banco Central di Hulanda. Aruba mes a pidi pa duna prioridad na firma e acuerdo di prestamo. Ainda Aruba no tin un cuenta special pa e placa aki na Banco Central di Aruba. Esey ta motibo pakico Hulanda ta pidi pa habri uno mas lihe posibel. Pa e pagonan futuro di prestamo Aruba lo duna un dispensacion di e provision di divisa

Potret: Ret Karibense.