Recientemente a tuma luga e encuentro anual entre Ombudsmannen di Reino aki na Aruba cu a conta cu presencia di Ombudsmannen di Corsou, Sint Maarten, Hulanda y di Aruba, ken pa prome biaha ta participa den un encuentro entre Ombudsmannen despues cu Sra. Jurima Bryson a keda nombra como e prome Ombudsman di Aruba den luna di october ultimo.
Diamars ultimo despues di un charla informativo tocante e rol y trabou cu un Ombudsman ta eherce miembronan di prensa local tabatin e oportunidad pa dirigi algun pregunta na e Ombudsmannen presente.
Un di e topiconan principal di e encuentro anual di Ombudsmannen tabata pa brinda sosten y guia na e Ombudsman di Aruba. Un di e preguntanan cu a bin dilanti tabata ki otro topico a bin dilanti durante e dianan di e encuentro anual of si tabatin algun acuerdo cu a ser realisa entre e cuater Ombudsman.
Ombudsman di Hulanda, Sr. Reinier van Zutphen a splica cu a papia tocante topiconan importante cu tur cuater Ombudsman lo kier investiga. Un di e topiconan aki ta inclui, por ehempel, awa limpi. El a indica cu esaki ta algo cu tur hende tin derecho riba esaki y pa e motibo ey ta un topico cu mester investiga.
Otro topiconan cu el a menciona tambe ta personanan indocumenta, personanan cu problema cu inmigracion, abuso di mucha y abuso di hende muhe, entre otro. El a indica cu otro topico cu nan discuti tambe ta loke ta pasa cu studiantenan cu ta bay Hulanda, con nan ta adapta, si gobierno ta brinda suficiente ayudo, por ehempel.
E Ombudsman di Hulanda a remarca cu varios topico cu nan a discuti y cu mester di nan atencion, pero mester a scoge dos of tres topico pa enfoca riba dje den e aña binidero.
Pa loke ta e sosten cu e Ombudsmannen ta brinda Aruba, el a splica cu como cu esaki ta e prome Ombudsman di Aruba, e mes ta esun cu ta marca y ta dicidi con cos ta bay akinan. El a indica cu como e otro Ombudsmannan tin varios aña di experiencia, algun mas cu otro, nan ta brinda e sosten y guia basa riba esaki y ta comparti e experiencianan cu nan a pasa aden durante e ultimo añanan y e manera cu nan a atende cosnan.
E Ombudsman di Hulanda a sigui splica cu parti di e sosten ta inclui tambe cu e erornan cu e Ombudsmannen a comete pa no ser ripiti na Aruba y e cosnan cu a bay bon kisas si por pone den practica atrobe aki.
El a sigura cu e Ombudsmannen no tin e intencion pa bisa e Ombudsman di Aruba con pa haci e cosnan na Aruba, pero mas bien nan tabata kier scucha con nan colega nobo ta kere cu e ta bay haci’e na Aruba y con nan por pone nan experiencianan banda di dje.
“Pues Aruba ta na cabes. Y nos ta mira kico nos por haci cu nos mesun experiencia di e tres paisnan unda nos ta trahando. Con nos por yuda e ora ey den lantamento di e oficina lihe. Mi ta sigur cu Aruba awor ta wardando ki dia e lo cuminsa di berdad. Wel, nos tambe kier yuda cu esey cu e lo ta realmente un gran comienso,” el a enfatisa.
Otro aspecto cu a bin dilanti ta e hecho cu na Aruba e ley di Ombudsman ta diferente y ta inclui e utilidadnan. Esaki, e Ombudsman di Hulanda a splica cu lo tin un cambio den e resultado di e Ombudsman. El a indica cu e ta diferente na Hulanda, y na e otro islanan tambe pasobra e ley no ta inclui e utilidadnan.
El a menciona cu e principionan di Venesia tambe ta contene algo tocante esaki y su mes ta hopi curioso tocante e ta bay cana cu e coleganan cu si tin e oportunidad pa bisa algo al respecto y con esey lo funciona pasobra nan no ta gobiernonan, nan ta institucionnan priva al fin y al cabo.
“Esey ta loke mi a bin p’e. Pa tende con cos ta bay aki. Pa mi por usa esaki atrobe pa bisa na Hulanda nos no mester haci esey tambe? Nos mester organisa asina aki na Hulanda? Loke mi kier di berdad den mi curason,” e Ombudsman a indica.
Pa loke ta e conseho cu e Ombudsmannen tin pa e Ombudsman mas nobo, Sra. Jurima Bryson di Aruba, Ombudsman di Corsou, Sr. Keursly Concincion a indica cu di su propio experiencia e ta conseha e Ombudsman di Aruba pa keda den contacto cu gobierno, pasobra e Ombudsman mester haci e trabou su mes, pero no por haci’e su so. El a resalta cu pa e motibo ey e Ombudsman mester di cooperacion di e ministernan, di e ambtenaarnan, y mester di sosten di parlamento.
Ombudsman di Sint Maarten, Sra. Gwendolien Mossel a ratifica cu en berdad bon contacto ta sumamente importante pa e efectividad di e Ombudsman y a agrega cu mester djis sigui bay, y no give up. El a agrega cu mester keda papia di e trabou di Ombudsman, mester keda trece dilanti kico e rol di e Ombudsman ta y mester djis purba keda trece esaki dilanti den diferente manera cada biaha.
Ombudsman di Hulanda, Sr. Reinier van Zutphen a ratifica e importancia di e trabou di e Ombudsman y a resalta cu esaki ta entre otro pa recorda gobierno y institucionnan cu pueblo tin un defensor cu t’ey pa apoya nan y pa recorda nan cu tin acuerdonan na luga di con cosnan tin cu cana y con mester trata hendenan.
