Aruba tin gobierno…Cu no sa nada…?

Un luna pasa, dia 4 di juli, Aruba tabata conta 28 caso di Covid-19. Nos tur tabata tranquil, a kita tapaboca y distancia social tabata parce manera un mal soño remoto. Nos tur por a sali atrobe na nos antoho, no tin nada pa stroba nos. Claro cu tabatin lugar cu a mantene nan restriccionnan relaciona cu Covid-19, y ora bo kier drenta bo mester ta prepara pa esey. Pasobra bo no por sa nunca, berdad?

Wel, nos ta un luna despues y ta conta mas di 600 caso activo. Esey ta implica cu e situacion ta mes grave cu e ultimo biaha cu nos tabata na e nivel ey? Ultimo biaha cu nos tabata na e nivel ey, tabata dia 3 di april di e aña aki, mientras e curva di caso activo tabata bahando te na casi cero, bao di 20 caso activo na juni. Punto di preocupacion pa nos autoridadnan? Aparentemente cu no; ta parce cu nan a bay cu vacacion y por lo pronto a laga Covid pa loke e ta. Como contra-argumento nos ta tende cu no mester preocupa, pasobra un bon parti di e poblacion ta vacuna. Esey ta berdad, pero nos no a yega ‘herd immunity’ nunca, asina leu cu nos sa. Ademas, no ta nan mes a anuncia cu no tabatin suficiente test mas disponible y tabata warda esakinan yega di exterior? Di otro banda, ta un variante diferente ta esun mas presente awor, cu tambe tin victima bao di esnan vacuna completamente, aunke e ta un minoria.

Straño ta den henter e asunto cu no ta tende nada di e ministro encarga cu salubridad publico, cu tambe tin e cartera di turismo, cu por keda afecta si e cos aki bay for di man y cu lo mester tuma medida. Esey no lo toca nos como ciudadano so, sino henter economia. Tambe mester tuma na cuenta cu hospital ya caba ta acercando 20 persona interna di cual 25% den ICU. Esey ta cinco cama menos disponible pa otro pacient y ainda tur cos ta tranquilo, aunke hospital mes si a aumenta su exigencianan di precaucion. Y ainda e mandatario ta parce ‘lost in action’ aunke solamente pa e parti aki di su cartera. E departamento concerni tin dos luna casi sin saca instruccion o recomendacion nobo.

‘Mi no sa nada’

Tambe no ta scucha nada di nos ministro presidente, cu muy probablemente ta debe aumento di su popularidad electoral na su aparicion constante den publicidad pa duna hopi hende e confianza cu tin hende na timon di e pais cu sa kico nan ta haci. Nada di esey awor.Y no solamente den e caso di salud aki. Nos a cuminza custumbra caba cu e maña di ‘no sa nada’. Un tactica cu por cierto e ministro presidente Hulandes tambe a eleva te na nivel di arte, pa despues ora e bom rementa bisa cu mester tuma accion contra esnan responsable, cu por arte de magia semper ta otro hende, no e mes. Asina tambe den e caso di retiro di dos director na WEB Aruba NV, unda aparentemente tur cos ta sucede ‘na distancia’, di tal manera cu e ministro presidente por bisa cu e ‘no sa nada’ y cu ta otro hende a maneha e asunto. Pero no ta asina e asunto ta. Berdad ta cu a crea un structura di supervision via e compania Utilities Aruba NV, cu supuestamente mester maneha tanto WEB como Elmar, pero den e proceso a cambia cantidad di cos den nan statuutnan, cu ta duna e compania matriz poder di interveni directamente den e empresanan, manera den caso di kita y pone director, normalmente trabao di e asamblea di accionista di WEB o Elmar. Di e manera ey Utilities, cu ta opera directamente bao mando di ministro presidente, ta dirigi directamente tur cos den WEB y Elmar.

E pregunta ta, si despues di pretende cu ta mantene tur cos na distancia, ‘at arms length’ manera e termino internacional ta, pakico ta corta e braza despues te reduci esaki na tamaño di un enano? Y tuma na cuenta cu esey no ta solamente bao di e gobierno aki; e trikinan cu e statuutnan ta data di basta aña pasa caba. E siguiente pregunta ta anto pakico tanto payasada cu board di supervision di WEB y Elmar, si nan no tin nada di supervisa, pasobra esun nombra politicamente den Utilities ta manda toch? E contesta ta masha simple: asina ta crea hopi puesto bunita pa amigo y famia… Y den esey nos no ta mira nada ta mehora, tur cos ta parce repiticion di gobiernonan anterior, geel y berde. Manera tambe e caso di uso di cierto bufete di abogado so, no solamente pa trabao huridico sino tambe den puesto den varios entidad estatal. Ta parce cu ta esun colega abogado ta e unico persona na Aruba di berdadero ‘confianza’ pa e gobierno aki, pasobra ta tur caminda ta topa su nomber, tambe den e asunto/negoshi di LNG.

Mientras tanto, nos ministro presidente no ta laga ningun ocasion bay perdi pa pronuncia e palabranan ‘integridad’ y ‘transparencia’, cu na e altura aki no tin ningun valor mas. Su gobierno no a drecha absolutamente nada den cuatro aña pa para corupcion, y mester duda cu ta bay haci algo den e proximo cuatro. Hende sa cansa.