E sorpresa di dia sigur tabata e noticia cu Aruba tin un Gobernador nobo. Conseho di Ministro di Reino a dicidi riba nan escogencia pa propone na Rey como su representante na Aruba. Despues di tanto papia y comentario innecesario den e asunto aki, por fin un decision. Laga nos cuminsa cu bisa di biaha cu ta trata di un persona cu ta digno di ocupa e puesto halto aki, den tur sentido di e palabra. Un di e aspectonan mas importante di e nombramento ta, manera nos a yega di comenta den e editorial aki mas tempran den aña, ta cu mester ta trata di un persona cu mester por haya e respet di tur ciudadano, independiente di color politico, creencia o filosofia.
Y ta p’esey e seleccion di e persona aki no por ta obheto di comentario publico di antemano, pero mester tuma luga na un manera discreto, pa mas cu nos ta para pa transparencia den tur otro asunto di gobernacion. Esey ta trece cu ne tambe cu como medio di comunicacion, nos no ta interesa ta con a yega na eligi e persona di, awe ainda, nos Ministro Plenipotenciario na Den Haag pa e puesto aki. Pa nos ta suficiente pa sa cu esaki ta un di e personanan cu mas ta reuni tur e cualidadnan cu mester tin pa por funciona den e puesto dificil aki. Anto por bisa di curason: bon bini den e funcion aki y ta spera cu e por haci un tremendo trabao.
Pero ta importante pa dedica atencion y un palabra di aprecio na e Gobernador saliente. Pa mala suerte e persona aki mester a pasa den e momentonan mas scur cu e posicion di Gobernador di Aruba mester a experimenta, y esey fuera di su responsabilidad y alcance. Hopi a ser bisa den e dianan dificil na juli 2014, tempo cu un monton di hende cu mester sa miho, a haya ta bon pa ataca su persona pa cos cu tin di haci cu e puesto, y no cu e mes como ser humano. Mas tristo ta ora e ofensanan aki tabata ser lansa pa hende studia cu mester sa masha bon cu bo no por papia asina di un persona cu mester cumpli cu e exigencia number un di su funcion, y esey ta cu e no ta comenta nada pafo di su oficina. Ta p’esey tambe cu ta un ley no skirbi den Reino Hulandes, cu ora bo tin e honor pa drenta den oficina di Gobernador, ta mescos cu ora bo bay di bishita cerca e Rey mes: loke a papia eyden, ta keda eyden! Bo no por sali y conta cu “si, el a bisa cu”. Bo ta keda keto anto bay haci loke ta toca na abo pa bay haci.
Loke un Gobernador ta haci den su funcion, hasta y sigur ora e ta nenga di firma algo, no ta pas cu ta dun’e e mesun trato cu un ministro ta haya, pasobra e ministro si ta responsabel pa loke ta pasa y mester duna cuenta na comunidad y parlamento ta kico ta pasando. Ta e como ministro mester cuestiona y interoga riba e asunto. Cu nos pueblo no ta semper na altura di e tipo di reglanan di oro cu ta rondona e posicion di Gobernador, ta di comprende. Pero ta na esunnan cu si tin e conocemento, pa enbes di nan abusa di esaki y ataca e Gobernador na un manera cayehera, como si fuera e ta nan pareu, nan lo ta digno di e educacion cu nan a haya y atende asunto na un manera ‘zakelijk’. Nos falta keto bay un palabra pa expresa e significado di e palabra Hulandes aki. Y nos ta spera cu nunca mas mester bolbe na e sucedidonan di e tempo ey, pasobra e ta duna muestra di falta di respet pa loke ta mas sagrado den un pais.
No mester lubida cu esaki ta e persona, di ken e presencia ta esun mas aprecia, cada biaha cu e yega nos tur ta lanta para y ta scucha hunto cu ne nos himno, y ta lanta para atrobe ora e ta bandona sala, no pasobra e ta tal persona, cu nos conoce desde su infancia talbes, cu nos a bay scol cu ne, anto esey no ta haci’e mas cu nos.. Si, e ta mas cu nos, na momento cu e ta drenta o subi escenario cu e encargo ey, representando nos tur hunto, e merece e respet di un y tur, pasobra faltando respet pa su persona, nos ta deshonra nos mes y tur cos cu ta uni nos como pais y como pueblo.
Laga nos cuminsa un era nobo, unda nos ta percura conhuntamente, sin distincion politico, pa duna muestra na tur momento di respet na esun cu a eligi como representante di Rey entre nos. Pasobra asina e asunto ta y ta keda: nos no ta eligi un representante di Aruba cerca Rey; ta Rey ta eligi su representante entre nos, teniendo cuenta cu e cualidadnan cu e mester tin.
Bon bini na e Gobernador nobo!
