Diadomingo ultimo carga cu lamunchi, awacati y banana, dos barco a sali for di waf di La Vela di Coro estado Falcon caminda pa Corsou como parti di e reactivacion di intercambio comercial entre e islanan di Bonaire, Aruba y Corsou. Sinembargo, Aruba te ainda no a ricibi e prome barconan.
Despues di cuater aña sin actividad debi na ceramento di fronteranan, e relacionnan historico di intercambio comercial a activa back cu e salida di e dos prome barco carga di fruta cu a sali for di La Vela di Coro caminda pa Corsou.
Ayera den oranan di atardi prome minister di Corsou a haci un ceremonia di bonbini na botonan proveniente di Venezuela den marco di apertura di fronteranan maritimo y aereo: “prome minister Sr. Pisas ta hopi gradicido na tur su miembronan di Gabinete Pisas II, e instancianan gubernamental y principalmente na tur e respetivo funcionarionan di Gobierno cu ta forma parti di e grupo di trabou. Un danki ta bay na Fundashon Marshe Nobo y DMO pa e bunita ceremonia cu nan a hinca den otro pa e momento tan memorabel aki,” el a sigura riba su rednan social.
Pa loke ta trata Aruba, prome minister Evelyn Wever-Croes a sigura na Bon Dia Aruba cu “ningun barco a meld su mes ainda. Entre e agencia aki na Aruba y e barco aya na Venezuela nan mester regla un cu otro y cumpli cu tur rekisito. Gobierno di Aruba no tin un rol den esaki.”
Ademas, el a sigura cu te ainda no tin un fecha di ki dia e prome barconan ta yega Aruba for di Venezuela.
Pa cu esaki, dia 4 di mei, prome minister a informa cu tin condicionnan hopi estricto pasobra ta importante pa tin bon control, entre otro, e barconan cu ta bin di Venezuela ta bin bou di un agencia na Aruba. Esaki kiermen cu niun barco ta permiti pa yega Aruba pa bende producto na Aruba sin instruccion y responsabilidad di un agencia na Aruba. E tripulante di e barco no tin visa pa por drenta Aruba por lo tanto nan por keda 48 ora riba Aruba sin cu por sali for di e tereno di waf.
Te cu awo desde cu frontera maritimo a habri, no tin ningun barco cu a drenta ainda y haci uso cu frontera ta habri oficialmente. Tin varios papeleo na Venezuela y na Aruba pa cumpli cune cu ta tuma tempo.
“Talbes den e dianan nos dilanti nos por cuminsa importa fruta y berdura, comestibel, material di construccion, entre otro, na prijsnan mas barata cu nos ta hayando actualmente cu lo por yuda cu e peso di costo di bida halto cos tin na Aruba,” prome minister a declara.
