Director di departamento Maritimo (Directie Scheepvaart), Sr. Carlyle de Coteau ta declara na Bon Dia Aruba cu nos isla no ta cla pa e operacion di un ferry.
E conclusion aki a bin despues cu el a pidi un reunion cu e departamentonan di APA, Duana y Inmigracion riba e anuncio cu un compania Venezolano, Naviera Paraguana, a haci cu nan lo cuminsa opera un ferry den su prome fase entre Guaranao-Aruba-Guaranao pa final di luna di october awor.
Sr. De Coteau a bisa cu niun autoridad local a confirma oficialmente riba operacion di e ferry aki. E no ta un decision cu nan por tuma di awe pa mañan, ya cu e ta envolvi diferente ministerio, y cada un di nan mester duna su debido aprobacion. “Nan di cu nan kier opera pero niun hende a duna autorisacion”, e ta bisa.
Reunion
Aunke APA ta e departamento cu mester duna aprobacion, esaki no a sosode ainda. Den e reunion cu nan a sostene a keda cla cu APA no a duna autorisacion, pero si nan a laga sa e compania en cuestion, cu si nan kier opera un ferry, nan tin luga pa ricibi nan riba waf.
Pero e no ta un autorisacion pa cuminsa opera otro luna, ya cu prome cu esaki, nan mester bin cu personal di Duana y Inmigracion pa haci e trabou, y tambe mester condiciona e luga unda e ferry mester opera riba waf. E ta un proceso cu Sr. De Coteau no ta wak factibel pa e aña aki ainda.
E ta kere cu e compania aki den nan plan di negoshi a pone pa cuminsa nan operacion na october. Pero Sr. de Coteau ta indica cu logicamente nan mester a check cu nos autoridadnan competente prome.
Tres aña sin informa
“E fout cu nan a haci ta cu nan a sigui traha tres aña largo ariba nan banda, pero nunca nan a informa nos, of pone un representante na Aruba pa coordina tur dos banda. Y esey no a tuma luga”, segun Sr. De Coteau.
Director di departamento Maritimo ta haya fastioso den e proceso aki cu ni e ministernan sa, a lo menos e ministernan di Transporte, Economia, Husticia y Finansa caminda e departamentonan Maritimo, APA, Inmigracion y Duana ta resorta den nan respectivo ministerionan.
“Tur cuater mester ta di acuerdo, pasobra si dos por of tres por y un no por, e no por sigui. Niun hende a duna autorisacion”, e ta bisa.
Sr. De Coteau a bisa cu pa loke ta e trabou di departamento Maritimo, nan ta esun cu ta inspecciona e ferry pa wak, si nan ta cumpli cu tur exigencia di siguridad pa opera riba nos lama teritorial.
Sr. De Coteau a splica cu e departamento Maritimo tin un rol diferente na e departamento di Aeronautica Civil cu si por otorga permiso pa compania aereo lo por bula y bin Aruba.
Aruba no ta cla pa october
E ta bisa cu e compania di ferry menciona lo por tin intencion di inicia opera otro luna, pero “e lo ta imposibel pasobra Aruba no ta cla”.
Durante e reunion cu el a convoca dialuna ultimo, Sr. De Coteau a tende for di inmigracion cu nan no ta cla, ya cu nan mester di mas personal y ekipo, y nan no ta cla pa ricibi e ferry. Ademas nan no sa si nan ta haya mas hendenan for di minister di Husticia.
APA tambe mester haci un par di inversion pa ricibi nan, y tampoco APA ta cla. Y Duana tambe ta den e mesun situacion aki. “Esaki kiermen cu si nan kier opera for di october, Aruba no ta cla pa ricibi nan”, asina categoricamente Sr. De Coteau a declara na Bon Dia Aruba
El a bisa cu nunca a tende di e compania aki y nunca el a sinta cu representante di e compania Naviera Paraguana. Sr. de Coteau a bisa cu te siman pasa, nan a bin tende di e compania aki, ora cu un agencia a acerca su departamento, riba un grupo di Venezuela cu ta interesa pa inicia opera un ferry.
El a manda su capitan di waf (havenmeester) pa bay papia cu e grupo di Venezolano di e compania di ferry Naviera Paraguana, y e ora el a haya sa cu ta e mesun grupo cu tres aña pasa a bay busca informacion cerca nan.
Sr. de Coteau a bisa cu den e periodo di tres aña el a sinta cu asina hopi hende cu e no ta corda di ken ta trata. E ora ey el a haya cu un di e miembro di e grupo ta un dokter Neurologo. E ora ey el a haya sa cu e grupo aki tin un fast ferry y cu nan tin plan pa bin opera na Aruba.
