Den e turbulencia causa pa e conflicto cu chauffeurnan di taxi cu tin cu ministro di transporte publico tin un cos cu a resalta mas: e preocupacion di mayoria di interesado pa posible daño na turismo. Naturalmente practicamente tur hende lo ta di acuerdo cu e advertencia duna di varios banda, al final de cuentas ta di esey practicamente tur ta come, pero no mester exagera tampoco. No cu nos ta di acuerdo cu e taxistanan, nada menos cu esey, pero si di berdad tur hende ta asina preocupa cu desaroyo sano di turismo, pakico tin asina poco animo pa haci algo na e menazanan a largo plazo pa turismo, cu ta hopi mas grave cu un incidental accion di protesta? Y, pakico ora hende protesta tocante e menazanan real aki, argumentando cu demasiado hotel y otro acomodacion a lo largo ta mata e ‘webo di oro’ di cual hopi ta papia, ta exigi cu mester actua cu man duro contra esnan cu ta trece dilanti loke cada persona cu algun sentido comun mester por comprende? Kico ta e problema, nos gobernantenan y otro persona di peso den economia simplemente no kier scucha loke cualkier persona ta comprende?

Loke ta pasando aki, segun nos opinion, ta cu ya turismo a bira nos baca sagrado, unda ta trata mas tanto posible pa silencia tur voz cu posiblemente ta bay en contra di e interes percibi di e baca sagrado. E exageracion ta den e sugerencia cu cualkier accion ta atenta contra interes di turismo. Asina ningun grupo lo por organiza un protesta pasobra esey ta atenta contra interes di economia, por lo tanto contra interes di turismo, y esey lo keda asina pa hopi aña. E problema no ta solamente den cierto exageracion di e efecto di protesta riba turismo, sino tambe den e hecho cu ta ignora, conscientemente of no, e efecto di comentario negativo for di turismo mes, cu ta señala cierto cambionan negativo den e caracter di nos turismo. Nos ta referi aki na e creciente cantidad di referencia negativo di bishitante riba medio social cu ta duna opinion critico encuanto e caracter di deterioro cu nos turismo ta mustrando mas y mas. E comentarionan ey ta disponible pa miles di persona rond mundo lesa y segun nos ta haci mas impresion cu e noticia cu un grupo di ciudadano local a protesta contra algo cu nan gobierno no lo a haci bon. Tur e turistanan ey ta biba den un pais real unda e mesun incidentenan aki ta forma parti di bida real. Ta hopi mas grave ora un turista, despues di su bishita pa conoce nos isla, ta yega na e conclusion cu e no tin nada mas di busca aki den un siguiente bishita pasobra e lugar ta demasiado yen di turista, cu un naturaleza deteriora, centronan di ciudad den decadencia y prijs cu como unico tin un berdadero nivel di ‘cinco strea’…

A pesar di e desaroyo negativo aki, cu ta birando mas visible cada dia, maneho gubernamental ta keda domina pa obedece ciegamente na loke adoracion di e baca sagrado ta exigi. Ta pesey cu ciudadano preocupa cu desaroyo exagera na Sero Colorado ta ser describi como hende cu ta contra progreso, ta pesey tur hende mester keda keto ora ta ‘bende’ e ultimo beachnan manera Baby Beach y Rogers Beach pa supuesto progresote hasta Santana di Cacho unda no por tin beach adecua mes, pa acomoda turista.

Naturalmente nos ta prepara pa e reaccion logico cu ta bisa: “Pero esaki ta lo unico cu nos tin, nos mester cuid’e…” Completamente di acuerdo, pero esey ta loke nos mester a haci di comienzo caba. A haci uso di e promesa ilusorio di desaroya sector economico alternativo, a sabiendas cu esey no tabata bay logra, pa despues habri porta hancho pa cualkier desaroyo den turismo, pa exagera cu e por tabata, pasobra ‘por lo pronto no tin nada otro’…

Sin embargo, no ta pasobra turismo ta nos unico pilar economico, esey ta implica cu no por haci un distincion entre crecemento sano y crecemento absurdo cu ta hiba nos exactamente den e direccion robez. Y e gritonan pa demostra algun sensatez den e asunto aki no ta di e temponan aki so, unda nos politiconan a ‘descubri’ e lema di desaroyo sostenible cu tabata existi pa hopi tempo caba, ta nan no tabata sa. Pa varios decada e advertencianan contra exageracion den desaroyo economico a topa cu un muraya di negligencia di gobernacion y di e sector mes, cu awor lo ripara cu e competencia cu lo manca henter e industria, t’ey caba… Awor ta bin e ‘rush’ pa contrata personal di calidad, cu e agravante cu asina mes centenares, talvez miles di cupo di trabao ta keda habri o mester scoge pa emplea hende leu bao di e nivel profesional necesario. E presion laboral aki lo percura temporalmente pa aumento den nivel di salario, cu na su turno lo causa un alza den nivel di prijs, pasobra cada empresario lo busca compensacion pa nan payroll aumentando prijs cu nan ta pidi pa nan producto o servicio. Esaki ta crea atrobe un buraco mas den e cartera di esunnan cu empleo menos bon paga, habriendo mas ainda e brecha entre esnan acomoda y e mayoria cu na fin di nan placa semper ta resta un pida luna…

Nos ta na 10 luna di eleccion y no ta scucha o lesa cu nos politiconan ta consciente di e berdadero problemanan di e pais, cu no ta un accion di taxista, ademas no hustifica.