Bais, step, skates, skateboard y hasta scooter mester competi awor cu e ‘flashy’ Hoverboard cu tambe a yega Aruba. Riba cayanan, specialmente cu eventonan publico manera canamento y hasta carnaval, bo ta mira e ‘skateboard riba bateria’ mas y mas. Lastimamente pa esunnan cu tin uno, polis no ta permiti esaki riba caminda grandi. Esaki polis di trafico ta informa Bon Dia 24 cu na Aruba tambe ta prohibi, despues e siman aki a sali den prensa cu na Hulanda no ta permiti tampoco.
Segun e vocero di Ministerio di Infrastructura Hulandes, e productor no a presenta un aplicacion di permiso pa por core cu e vehiculonan aki riba caminda grandi. E fabricante a yega di solicita pa mas informacion na e posibilidad di por haci esaki, pero segun e ministerio ”e chens cu nos lo aproba esaki ta chikito pa motibo cu e vehiculonan aki no tin un stuur y pues no ta considera di ta legitimamente un vehiculo di transporte”.
Polis di trafico na Aruba ta indica cu un Hoverboard ta prohibi riba caminda grandi pasobra esaki no ta keda registra y no ta paga impuesto. Pero nan ta permiti coremento si den parke of cualkier otro caminda cu no ta caminda grandi.
Popular
Bon Dia 24 a entrevista diferente bendedo di e Hoverboard cu ta indica cu berdad e vehiculo a bira masha popular aki. Sr. Roshan, store manager di Baba’s Electronics ta conta cu nan a trece un carga di Hoverboard nan den december cu a caba mes ora. Nan lo tin un carga nobo ta drentando mas o menos aki 2 luna. Segun assistent supervisor Maikelys Hernandez di Crown hopi hende ta pidiendo pa motibo cu nan ta un tienda basa riba credito. Un Hoverboard no ta barata, e ta splica, pues asina hende por pag’e poco poco. Pero nan no ta bende nan ainda, y ta investigando mas pa mira si nan lo trece e vehiculonan.
Pa tene na cuenta
Segun un rapport di NBC Connecticut publica riba 10 di december 2015, nan a lista 8 casonan rond di Merca di e vehiculonan aki pegando na candela riba nan mes. Director di Brandweer na Suffield, Chuck Flynn, a conta NBC pa: ‘’no carga e bateria di mas, mayoria di nan no por wordo carga mas cu 90 minuut, tambe, percura pa bo laga e vehiculo ‘cool down’ prome cu bo pone pa carga’’.
Store manager Roshan ta bisa cu te awor nan no a haya niun keho di cliente. Un otro empleado cu a compra uno pa su yiu di 8 aña ta splica cu mester sigui e instruccion. Eyden ta para cuanto tempo bo mag di carga e bateria.
Artista local Lislaine Bermudez ta conta Bon Dia 24 cu e tambe a cumpra un Hoverboard na december pero nada a pasa te awor. ‘’Djis purba di tene un wowo riba dje ora cu bo ta cargando e bateria, semper zorg pa bo tine bao di bon supervision.”
Siña balansa
Sra. Bermudez ta agrega cu e no ta mesun facil pa siña core un Hoverboard den comparacion cu por ehempel un skateboard. Hoverboard nan ta rekeri pa bo siña balansa bo mes bon pa bo por core riba dje sin problema. E ta conta cu e ta core den su cas mes y tambe ora cu e ta bay cerca su amigo cu ta biba mas o menos 20 minuut di dje. E ta uz’e tambe pa bay supermercado aki aya, pero e ta avisa cu e ta miho pa core riba caminda di asfalt y evita core riba caminda di santo of tera.
Tambe tin modelo cu tin wiel mas grandi, Bermudez ta sigui splica, ”y esakinan ta wanta mas miho riba caminda di tera”.
“Mi tabata tin un scooter electronico tempo cu mi tabata mas jong, pues semper mi a gusta e tipo di vehiculonan aki’’.
Un tiki tocante e Hoverboard
Despues cu ‘Marty McFly’ a subi riba un Neon Hoverboard den e pelicula ‘Back To The Future II’ cu a sali den aña 1989, grandinan y chikito a warda riba e dia cu esaki lo bira un realidad.
E Hoverboard cu nos ta conoce awe no por bula manera esun di Marty. E tin dos wiel y ta yama un Hovertrax. E compania Inventist, cual ta un compania di tecnologia na Camas, Washington, a inventa esaki.
E tienda grandi Walmart a duna indicacion cu e producto aki lo bira algo grandi despues cu nan a anuncia cu nan lo bende varios modelo cuminsando 1 di november 2015. Y berdad, esey a sosode.
.jpeg "Comerciantenan evaluando si ta trece mas carga di Hoverboard")
