Dia 19 di maart ta un fecha conmemorativo na unda Aruba tambe ta uni na e celebracion di Dia Mundial di Trabao Social, esnan cu eherciendo e funcion di trahado social ta busca crea un realidad hopi mas positivo den diferente gruponan social cu ta conforma un pais.
Nan ta e personanan cu ta detecta e realidad di e comunidadnan, ta busca solucion pa problemanan, pero tambe ta probecha oportunidadnan rond di dje pa haci cu famianan, bisiñanan of miembronan di un conhunto social, haya un mehoracion positivo den nan realidad.
Tabata na aña 2008 ora na Asamblea Mundial na Salvador di Bahia, Brazil, unda e Federacion Internacional di Trahadonan a crea e dia aki. Nan a scoge e di tres diamars di maart, un dia hopi celebra y respeta pa tur trahado social rond di mundo.
Nan ta e activista cu ta busca mehora e condicionnan social di un grupo di persona, den nan famia, comunidad of di henter un pais, nan trabao ta di detecta e necesidadnan of desafionan cu personanan miembro di un colectivo di interes ta enfrenta pa yuda nan haya solucion na nan carencia.
Segun Federacion Internacional di Trahadonan Social, e tema di e aña aki pa Dia Mundial di Trabao Social ta “Buen Vivir. Un futuro comparti pa un cambio transformado,” den dje ta pone enfasis riba e necesidad cu trahadonan social mester adopta enfoke innovador, lider pa comunidad, basa den sabiduria local y coexisti cu naturalesa.
Un elemento central di e cambio transformado aki ta e principio di “Biba Bon” enfatisa riba e berdadero bienestar cu por logra ora comunidadnan ta biba den harmonia cu naturalesa, enfoca riba un desaroyo ekilibra.
E dia aki ta un oportunidad pa esnan cu ta eherce e bunita labor aki pa por involucra nan mes den rednan di trabao social cu cual ta colabora pa contribui di manera conhunto na balornan y principionan cu ta permiti reconoce y respeta e dignidad di tur hende.
Cada aña organisacionnan di trahado internacional ta compromete nan mes di traha hunto pa influi den politicanan nacional, regional y local, accionnan di gobiernonan y pa destaca e balor y contribucion di esnan cu ta dedica na e labor aki.
Na Aruba ta existi diferente fundacion y organisacionnan cu ta componi di trahadonan social cu cada dia ta dedica nan tempo y conocemento na esnan cu ta pasando den un momento hopi dificil, sin nan ayudo e comunidad no por bay dilanti.
Un palabra di pabien na esnan cu tur dia ta duna nan sabiduria pa Aruba tin un comunidad mas inclusivo y harmonioso.
