Aruba ta yegando na 80mil auto registra na departamento di Impuesto. Te dia 8 di januari ultimo, nan tabatin registra 87.974 vehiculo di motor. Pero un par di ora ya caba nan a yega na 88.001 vehiculo registra, asina vocero di e departamento aki, Meverlyn Romano a informa.
E cantidad aki ta keda aumenta cada aña y nan ta ripara cu rapidamente ‘Aruba ta yenando cu hopi auto. Nos ta ripara esaki den e trafico’ el a bisa. E categoria mas grandi ta keda e plachi tipo ‘A’ cu 76.887 auto. Un 88% di e total cu nan tin registra actualmente, cu ta 77.513, a haci e pago completo di belasting.
Mientras cu un 3% ta representa 2.661 plachi cu ainda mester wordo paga pa e dos mita di 2019. Un cifra di 5.719 cu no tin un pago mes pa aña 2019, cu ta representa un 7% di e total di vehiculo registra den e departamento aki. Ambos ta un suma di mas cu 8 mil plachi cu no a wordo paga. Kiermen 10% no a haci pago completo di aña 2019 of no a haci pago mes. “E 8mil algo aki ta un cantidad toch considerabel, mirando cu nos aña ya a cambia…” el a bisa.
Nan tin un cantidad di 2.081 plachi cu ta nifica un 2%, nan ta di e personanan cu pa un of otro motibo a entrega nan plachi, ya sea temporal of definitivamente.
E plachi actual di 2019 colo oraño cu blanco ta keda valido te fin di maart. Cliente nobo lo haya temporalmente e plachi di aña 2019 y na momento cu departamento aki tin disponibel e plachi 2020, e cliente nobo lo haya e plachi aki.
