Departamento di Salubridad Publico (DESPA) ta bon na altura di e virus “Mayaro” cu ta wordo transmiti pa e sangura Aedes aegypti cu ta e mesun sangura cu ta transmiti Dengue, Chikungunya y Zika.
E experto Microbiologo na servicio di DESPA, Wilmer Salazar ta bisa cu nan tin informacion cu na Haiti tin caso di Mayaro cu a wordo detecta. “Mayaro su accion ta leve.”
Dr. Salazar ta bisa tambe cu Mayaro ta un virus cu no tin e gravedad manera esun di Dengue hemoragico; pero si nos mester ta alerta riba dje. Mirando cu nos tin e presencia di e sangura Aedes Aegypti nos mester adopta tur sistema di prevencion pa elimina e criaderonan di sangura. Ya cu nos ta vulnerabel pa e presencia di e virus Mayaro.
“Si nos ta permiti entrada di hendenan cu por tin e malesa y nos tin e sangura, nos por tene algun casonan di e virus Mayaro.”
Protocol
Ministerio di Salud Publico ta trahando pa bin cu un protocol y pone atencion riba e parti aki pa mantene nos pais safe di e vector di e malesanan cu e sangura mes ta transmiti.
Sr. Salazar ta bisa cu e virus aki ta uno procedente di Sur America y e ta mas tanto na Bolivia, Peru, Ecuador y na e frontera cu Argentina. E ta un virus cu ta causa keintura, dolor di join nan, iritacion y te hasta lo por presenta algun complicacion di sangramento, pero no hopi.
Ta sumamente importante pa nos comunidad haci prevencion contra sangura, segun Sr. Salazar. Pueblo mester tene nan cas y cura limpi pa asina preveni criaderonan di e sangura Aedes Aegypti
Virus misterio
Nos partner den noticia Ret Karibense ta informa cu na Corsou 10 pashent ta infecta cu un virus desconoci. Nan a pasa cerca dokter di cas cu sintoma manera Chikungunya, esta keintura, dolor den weso y iritacion cora di cuero. Nan a test tur e pashent riba enfermedadnan di sangura manera Chikunguña, Zika y Dengue. Pero den tur caso e resultadonan tabata negativo.
Byron Martina, virologo na Universidad Erasmus y Universidad di Utrecht awor ta bay cu muestra pa investiga na Hulanda. E virologo cu tambe ta den contacto cu Aruba y a bin na un charla riba Zika na februari, ta bisa cu e infeccion kisas ta e virus Mayaro. E chens cu berdaderamente ta trata di Mayaro ta chikito si, e ta bisa. “E virus te aworaki ta existi specialmente den areanan cu hopi mondi cu macaco. Manera Brazil y Trinidad. Kiermen bo no ta spera esaki.”
Horcan Matthew
E virologo aki ta bisa algo otro cu nos departamento di Salud. Cu e sangura di Chikungunya, Denguey Zika no ta e mesun sangura cu ta pasa Mayaro. “Pero di investigacion den laboratorio nos sa cu e virus por adapta na sangura nobo. Despues di e horcan Matthew ademas e circunstancianan a bira masha positivo pa e sangura tiger. Si e virus adapta na e sangura ey nos tin un problema”, segun sr. Martina.
