Fundacion Parke Nacional Aruba organisa pa prome biaha un tayer pa por cuminza monitorea rifnan rond Aruba. E tayer di cuater dia ta conclui awe cu dia pa por haya e conocemento con por haci sondeo di rif y coral na Aruba

E sondeo y monitor ta necesario pa asina Fundacion Parke Nacional Aruba y Parke Marino Aruba por realmente cuminza haya data concreto riba e condicion di e organismo crucial pa bida marino y naturalesa en general.

E curso tabata facilita pa biologonan marino Tadzio Bervoets di Dutch Caribbean Nature Alliance (DCNA) y Roxanne-Liana Francisca di STINAPA Boneiro. Cursistanan cu ta participa ta representantenan di FPNA, JADS, ScubbleBubbles, Caribbean Lionfish Alliance (CLA), Aquawindies y Directie Natuur & Milieu (DNM), Director Interino di Parke Marino Aruba, Sietske van der Wal a splica.

Durante e curso di cuatro dia e cursistanan, tur sambuyado certifica, a haya e conocemento lo pa colecta data siguiendo standardnan y practica pa monitor rifnan di coral di Global Coral Reef

Monitoring Network (GCRMN) y di Atlantic and Gulf Rapid Reef Assessment (AGRRA).

Banda di e preparacion den e criteria pa monitor, tecnica y protocol, cursistanan a siña tambe con pa identifica pisca, coral, invertebrado, alga, malesa di coral, y especienan invasivo – cu

ta crucial pa monitor e bida di e rifnan di coral.

Rif di coral ta un ecosistema cu posiblemente tin e biodiversidad mas halto compara cu cualkier

otro ecosistema na mundo. “Banda di ta increiblemente bunita, varia, y ta anfitrion di un

variedad asombroso di bida marino, rif di coral ta esencial pa e economia di Aruba. Rif di coral

ta proteha nos costa di mal tempo y ta un zona di cria y hogar pa diferente especie di

importancia vital pa pesca,” van der Wal a bisa, agregando cu rif di coral y su piscanan unico ta proveedor di Aruba su playanan bunita di santo blanco cu turista di tur parti di mundo ta bin disfruta.

Sinembargo, rif di coral y su habitantenan ta bou menasa pa desaroyonan na costa, recreacion marino y na costa, actividadnan maritimo, y polucion di tera, aire y lama, y otro impacto.

Sietske van der Wal kende tambe ta biologo marino a bisa di ta entusiasma cu porfin por

cuminsa colecta data na un manera mas structural. “FPNA ta maneha cuatro Area Marino

Protegi cu colectivamente ta cay bou e Parke Marino Aruba. Nos ta e unico pais den Reino cu

no ta structuralmente monitor e bida di e rifnan di coral ainda y cu e curso aki nos ta haya e

habilidad pa haci esaki nos mes.”

Desde awe FPNA, hunto cu e aliadonan, tur a base boluntario, lo inspecciona e rifnan di coral cada dos aña na ubicacion representativo y asina por determina e estado di e rifnan di Aruba s compara data despues di tempo y adapta maneho respectivamente.

Lo comparti e datonan cu entre otro DCNA y GCRMN pa por sigui tendencianan na nivel nacional, den Reino y regional.

Lo incorpora e data colecta durante e inspeccionnan den e maneho di Parke Marino Aruba.

Durante e presentacion ayera, Tadzio Bervoets a enfatisa e balor di colecta data pa por delinea maneho na forma sostenibel. Di su banda, Roxanne Francisca a ilustra con STINAPA y Boneiro ta haci uzo di data pa determina con ta maneha cu e Parke Marino di isla, un di e mas bieunan di e isla. “E parke marino di Boneiro ta existi pa mas di 42 aña y ta encapsula henter e lama rond di Boneiro. Y ta a base di zonificacion ta permiti actividadnan humano. Como tal, na Boneiro ta si tin un control mas rigoroso unda y te unda por ehempel un kitesurfer, windsurfer pero kizas mas importante un jetski por yega.

E monitoreo lo sucede a base di un combinacion di drones ekipa cu sistema automatico, cu midimento y conteo tradicional.

Bon Dia Aruba lo amplia riba e tema aki cu ta hopi relevante pa Aruba, mirando cu contra e ley di proteccion di naturalesa, no solamente a duna permiso pa piscamento cu harpun, pero tambe ta cla pa permiti pa saca por ehempel, kreeft for di lama. Tur esaki, sin cu tin e datonan necesario pa determina e periodo, e grandura di e animal, sin cu e por causa daño na henter e ecosistema.