Contrario di loke hopi hende a espera di mal tempo den e dianan aki unda tabatin alerta cora di advertencia pa tormenta tropical na Aruba, e potencial ciclon “Bonnie” a pasa sin laga basta dañonan material den e isla, ayera diahuebs solo a sali y tambe a haya awasero pa via di e nubianan cu e sistema aki a laga atras.

Den un conferencia di prensa di prome minister Evelyn Wever-Croes conhuntamente cu DOW y Meteo Aruba ayera merdia a wordo anuncia cu e mal tempo tabata moviendo na e parti west cu 20 miya pa ora, na e momento ey tabata mas cu 1.000 kilometer leu for di Nicaragua unda el a pasa Aruba diaranson ultimo den oranan di anochi lagando algun nubianan atras pa motibo cu area di Caribe te ayera tabata instabil y cu basta aire humedo, segun loke Rodney Tromp meteorologo di Meteo a sigura.

Te diaranson ultimo Meteo a registra 39.4 millimeter di awa y e biento di mas duro cu nan a registra tabata di 61 kilometer pa ora.

Manera el a sigura, ayera efectivamente awaseronan a cay unda cu Tromp tabata indica cu e chens cu lo a sigui registra mas den e proximo 24 oranan den cual nan ta keda monitor y si lo mester sigui den comunicacion cu Rampen Bureau y pueblo si lo ta necesario.

Di su parti, Marlon Croes director di departamento DOW a expresa cu Aruba ta un isla bendiciona unda cu ayera e isla a lanta cu poco dañonan material a causa di e yobidanan, tambe el a declara cu diaranson ultimo prome cu e pasada di e tormenta nan a ricibi 30 melding y oranan despues cu e tormenta a pasa nan a haya 44 melding mas, cu un total di 74.

Varios di nan tabata trata di pasada di awa y otro tabata trata di camindanan cu tabatin buraconan, matanan of santo cu a cay riba caminda.

Pa loke ta trata e areanan cu tabata den riesgo halto pa inundacion, Croes a menciona cu nan a pasa ayera mainta prome cu e awasero y nan tabata mustra bon unda cu ekiponan tabata den alerta y a soluciona algun problemanan cu a bin dilanti pa loke tabata trata clean-up di camindanan.

E beachnan cu tabata un preocupacion basta grandi, Bushiri a lanta sushi y e ekipo tabata trahando ayera den dje, Tamarijn Hotel si a sufri dañonan caminda hopi baranca a keda.

Nan a ripara tambe cu hopi mata a cay, matanan di kiwi cu den nan mayoria ta ubica den area di Noord unda cu nan a cuminsa lanta esun cu por y esun cu no por scapa mas nan mester a corta nan.

“Nos tin trabou nos dilanti pa nos por mehora nos infrastructura di manera definitivo pa futuro y nos por mitiga tur e riesgo” Croes a expresa.

Prome minister Evelyn Wever-Croes a señala cu Aruba a scapa di un tormenta tropical serio cu tabata menasa e isla loke a pone cu for di ayera 12or di merdia Aruba a bay back na normalidad y a elimina tur medida cu a wordo implementa, sector comercial ta trahando normalmente y sector publico tabata bezig pa awe den oranan di mainta por duna servicio sin interupcion unda cu mester a baha tur sistemanan y na algun caminda mester a haci algun trabou pa servicio por wordo duna.

“Aruba ta bay back na normalidad y scolnan tin cu habri mañan 1 di juli”, el a bisa.

Den e potretnan por mira algun area cu a ser afecta diaranson ultimo y tambe ayera diahuebs 30 di juni pa via di awaseronan.