Recientemente Ministerio di Turismo y Salud Publico di Aruba a tuma nota di aumento di Dengue na Corsou, unda lamentablemente ya a raporta tres morto. Pa preveni y pa Aruba ta na tempo, minister Oduber ya a duna Gele Koorts en Muskiet Bestrijding (GKMB) instruccion pa intensifica e medidanan preventivo, mirando e cantidad creciente di caso na Aruba.
Aunke na e momentonan aki no tin ningun brote di Dengue na Aruba, ta di importancia crucial pa nos haci tur cos posibel pa preveni esaki. Pa es motibo ministerio di salud ta haci un yamada na pueblo pa hunto nos sea responsabel y nos combati criadero di sangura.
Ministerio di Turismo y Salud Publico di Aruba hunto cu DVG ta continua monitoria e situacion di cerca y lo tuma medidanan adicional si mester. Ta pidi colaboracion di ful comunidad pa preveni un brote di Dengue na Aruba.
Ta esencial pa sigui e medidanan preventivo cu a ser comparti pa autoridadnan:
- Tira afo of warda tur obheto cu por retene awa, manera baki, taira di auto y pochi mata.
- Controla tur caminda paden of pafo di cas cu por tin awa para cu lo por bira un criadero di sangura.
- Proteha bo mes contra picanan di sangura door di bisti paña cu manga largo y pia largo, usa repelente di insecto y flit paden di cas, camber y tur area cu bo ta frecuenta regularmente cu producto pa mata sangura.
Ta conseha publico pa keda atento di sintomanan di Dengue y si tin e minimo sospecho di infeccion, consulta di biaha cu bo dokter di cas. Pa mas informacion tocante Dengue y medidanan preventivo, bo por bishita Facebook y Instagram di DVG Aruba.
