Segun minister di Financia Xiomara Ruiz-Maduro gobierno ta traha riba un plan structural pa financia publico manehabel.
Gobierno anterior nunca a fiha un plan structural pa yega na un financia publico manehabel. Esaki ta bira e diferencia entre e dos gobernacion. Gabinete Wever-Croes kier hiba un financia publico manehabel y lo no haci cosnan incidental/ad-hoc, sin planeamento.
E minister ta bisa cu gobierno di Aruba kier cumpli cu palabracionnan pasobra Aruba ta bao un supervision financiero.
Minister Ruiz-Maduro ta bisa cu esaki ta bira e apertura tambe di locual lo bira e negociacionnan cu lo mester tuma luga mas den aña cu politiek Den Haag pa asina nos stipula con nos lo sigui dilanti sigur pa locual ta e supervision cu aworaki tin. Tambe den e reunion cu secretario Knops a informa e manera con GabineteWever-Croes lo traha pa asina Aruba por conoce un financia publico manehabel y manda un señal na mundo henter cu gobierno y Aruba ta confiabel, e ta bisa. “GabineteWever-Croes lo salvaguardia nos financia publico pa asina nos yiunan tin bon oportunidad di progreso riba nos pais.”
“E reunion a bay den un atmosfera ameno caminda Aruba a indica cu ta desea tempo pa por pensa y por traha riba un plan den cual na un manera structural Aruba por yega na un financia publico manehabel”, asina e minister ta indica.
