Aña pasa na luna di april, Gobierno di Aruba a manda un carta na Departamento di Estado di Merca na unda Aruba a comprometi su mes na e Plan di Accion (NAP) pa como pais por mehora loke ta trata e area di traficacion di hende.

Den e carta a comprometi cu e parti operacional ta keda den man di Coordinatie Centrum Mensenhandel Mensensmokkel Aruba (CMMA) y como gobierno a pone fondonan disponibel pa cu esaki segun loke minister di Husticia a informa ayera durante un conferencia di prensa.

Despues di un aña, diahuebs ultimo Departamento di Estado di Merca a publica e Trafficking in Persons Report (TIP) 2023 unda ta indica cu awor Aruba no ta riba ‘watchlist’ mas loke nan ta considera como un logro: “E esfuersonan haci tabata extenso, asina a inverti hopi den e procesonan pa identifica y brinda sosten na victimanan di traficacion di hende,” el a bisa.

Den esaki nan a establece un centro di coordinacion esta e CMMA cu ta e organisacion encarga cu e tareanan asina importante riba e tereno aki di trafico y contrabanda di hende. Ademas nan a haci diferente campaña di conscientisacion y tambe inversionnan pa renoba structuranan existente cu por brinda como un shelter pa personanan cu ta victima di esaki.

“Pero ainda nos no ta caminda nos lo kier ta, pasobra nos kier sigui traha duro pa nos por logra yega na tier 1 y pa nos por logra esey, nos lo bay dedica nos mes y compromete nos mes tambe na Plan di Accion 2023-2024 pa loke ta trata e obhetivonan cu nos lo kier logra. Diferente di e puntonan cu nos lo mester duna atencion pa nos por logra esaki, ya caba ta den pleno ehecucion y nos ta premira tambe cu otro aña kisas nos por logra tambe pa yega na tier 1,” minister Tjon a sigura.

Tier 1 ta nifica e nivel 1 di reconocemento di politica di Estado destina pa prevencion, combatimento y eliminacion di delito di trata di persona. Na e momentonan aki Aruba ta ubica back na e tier 2 despues di tres aña ubica den e tier 2 wachtlist. Esaki ta nifica cu ainda tin trabou pa haci den area aki.

E parti di training ta algo continuo manera minister Tjon a indica y CMMA ta 8.13 no solamente na nivel local sino tambe na nivel internacional mirando tur e webinars cu nan ta organisa riba e materia aki pero hopi importante tambe ta e oficialisacion di e departamento cual tur documento ta cla caba y nan ta den spera di conseho di Departamento di Recurso Humano pa cu e parti aki.

Di e Trafficking in Persons Report (TIP) 2023 manera Jeannette Bars Richardson coordinador di CMMA a trece dilanti cu den e rapport ta publica e resultadonan di 188 pais den area di traficacion di hende pa cu aña 2022.

A haci proceso di reporta den aña 2022 un tiki diferente manera Bars Richardson a menciona. Den esaki a inclui un bishita personal di un representante di Departamento di Estado Mericano na Aruba den october di 2022 na unda durante un siman nan a cera conoci cu tur e partner y a haci bishita na diferente luga y a sinta papia tocante e informacion cu mester manda pa cu e rapport.

Departamento di Estado a duna recomendacionnan pa Aruba por mehora den e lucha contra traficacion di hende. E dos recomendacion mas importante ta pa investiga, persigui y condena traficantenan di hende y di dos, nan ta recomenda pa crea un procedura efectivo pa asistencia na victimanan di traficacion di hende.

Den e dos parti aki, Bars Richarson a sigura cu Aruba a tuma pasonan pa esaki caba den e aña aki mes, entre otro, e creacion di Standard Operating Procedures (SOP) pa asistencia na victimanan di traficacion di hende hunto cu International Organization for Migration (IOM) na unda nan a anuncia cu IOM ta bay yuda nan pa seis luna pa traha un plan di implementacion di SOP y nan ta spera cu pa e aña aki ainda of otro nan por ta ful operativo cu esey pa por cumpli cu exigencianan di TIP riba e tereno aki.

El a gradici tur esnan cu ta envolvi den area aki pa traha contra e delito di traficacion di hende y tambe el a reitera cu e oficialisacion di CMMA ta sumamente importante pa yuda su persona hunto cu e otro coordinador haya mas personal pa haci tur e trabounan cu ta necesario.

Di su parti, prome minister Evelyn Wever-Croes a sigura cu esaki ta un topico importante y serio pa motibo cu lamentablemente Aruba tin e problema aki: “Sinembargo, a pesar di e seriedad awe nos ta hopi contento y tin hopi motibo cu e upgrading di Aruba cu a haya un miho ranking pa loke ta trata traficacion di hende.”

Aruba ta un isla hopi cerca di Venezuela y e hecho di e crisis migratorio di Venezuela. Aruba su cercania ta keda un punto di interes pa e Mericanonan pa e motibo ey Merca ta pone un extra atencion riba Aruba unda nan a revisa tur e sistema y procesonan y a yega na e conclusion cu Aruba a haci un mehoracion considerabel.

“Cu esaki Aruba por ta considera como un best practices pa e region y e islanan. Cu Aruba ta un di e poco islanan di Caribe cu ta den tier 2 y cu nos a pidi pa yuda otro islanan tambe cu experiencia cu nos tin akinan,” prome minister a expresa.

Rapport TIP 2023 Aruba

“Gobierno di Aruba no ta cumpli completamente cu standard minimo pa eliminacion di trafico, pero ta haciendo esfuerso significativo pa haci’e. Gobierno a demostra un aumento general den esfuersonan den comparacion cu periodo di rapport anterior, considerando e impacto di pandemia Covid-19, si a haci’e, den su capacidad contra traficacion di hende; por lo tanto, Aruba a actualisa su nivel na 2. E esfuersonan aki a inclui e identificacion y prestacion di servicionan di apoyo na mas victimanan di trata; aumenta e deteccion di poblacion vulnerabel, loke a hiba na nuebe referencia di potencial victimanan; establece un contract permanente pa gerente di proyecto di Coordinatie Centrum Mensenhandel Mensensmokkel Aruba (CMMA), aumentando e stabilidad di e funcion. Gobierno a haci varios campaña di conscientisacion incluyendo un plan di estudio academico pa studiantenan di scol secundario. Tambe a aumenta e personal di Human Trafficking and Migrant Smuggling Unit (UMM). Gobierno a financia y a completa e renobacion di un structura existente pa crea espacionan pa drumi, biba y pa e personal di e luga di refugio planifica pa uso mixto, pero e refugio no a habri na 2022.

Sinembargo, e gobierno no a cumpli cu standard minimo den varios area clave. No a procesa ni condena ningun traficante pa cuatro aña consecutivo y ta falta di un protocol efectivo pa e verwijzing di victimanan y prestacion di servicio. Institucionnan clave contra trata di persona no a coordina completamente, loke a obstaculisa e enhuiciamento na delitonan di trata di persona.”

Manera nan a informa den ultimo cinco aña, traficantenan di hende ta explota e victimanan nacional y stranhero, e traficantenan ta abusa di hende muhe di nacionalidad Venezolano cu trafico sexual y tambe di hende homber cu trabounan forsa den industrianan di servicio y construccion di Aruba.

“Famianan, empresarionan of delincuentenan ta abusa di e personanan aki di Venezuela cu trabounan forsa den servicio domestico, construccion y sexo comercial. Hopi di e trahadonan domestico ta biba den cas di nan doño di trabou, loke ta aumenta e vulnerabilidad di trafico di hende. Gerente di supermercadonan Chines ta somete nan cu trabounan fuerte y algun habitantenan di Aruba ta obliga hende muhe Caribeño of sur Americano pa traha den industria domestico. Propietarionan di barnan ta huur casnan pa hende muhe cu visa di entretenimento pa adulto na prijsnan desproporcional pa loke ta trata e ganashi di e muhenan aki, loke ta aumenta nan vulnerabilidad di explotacion.”