Restriccionnan riba divisa na Aruba ta wordo suavisa, segun decision di Banco Central di Aruba. Ta trata di un proceso gradual.
Mirando e recuperacion constante di economia di Aruba, e perspectivanan positivo specialmente pa loke ta regarda turismo y e hecho cu e parametronan monetario y cambiario ta na un nivel aceptabel, Banco Central di Aruba (CBA) a dicidi di gradualmente elimina restriccionnan riba divisa den contexto di e efectonan economico negativo di e pandemia di Covid-19, segun a indica den un comunicado riba nan website.
Como resultado, for di ayera 1 di juni 2021, atrobe ta permiti pa realisa pagonan na no-residentenan den contexto di:
-Honorario di gestion pendiente pa empresanan mama, filial of ruman no residente (esaki ta aplica tanto na empresa priva como institucionnan financiero supervisa);
-Distribucion di herencia;
-Bienes inmueble cumpra;
-Donacion.
Ademas, for di ayera 1 di juni 2021, ta permiti pa persona fisico of residentenan na ken articulo 1 sub 1 di Ordenansa nacional riba transferencia di divisa ta referi, por realisa transferencia na nan propio cuenta bancario stranhero, te un suma maximo di Afl. 50mil pa aña calendario.
Finalmente, for di ayera, e fondonan di pensioen di empresanan y aseguradornan bao supervision di CBA ta autorisa pa:
-Realisa inversionnan den exterior te un suma maximo di Afl. 5 miyon pa aña calendario;
-Utilisa e cuenta bancario local pa realisa pago den exterior, incluyendo pago na seguro y pensioen den exterior, y pago di prima di seguro.
E otro restriccionnan cambiario cu ta estableci den e Anuncio Publico dia 17 y 27 di maart di 2020 ta keda den pleno vigencia na e momento aki.
CBA ta continua monitoreando di cerca e accionnan di divisa. Si ta keda dentro di e marconan aceptabel den proximo lunanan, CBA lo considera mas relahacion di e restriccionnan.
