Autoridadnan na Aruba a solicita documentonan for di Departamento di Husticia Mericano den e caso di extorsion contra Joran van der Sloot, incluyendo su descripcion di asesinato di Natalee Holloway na Aruba casi 20 aña pasa, segun Associated Press.
Manera a bira conoci caba, Van der Sloot a bay di acuerdo pa describi kico a pasa cu Holloway na 2005 como parti di un acuerdo di culpabilidad den un caso di extorsion. Van der Sloot a bisa cu el a bati Holloway te na morto riba un beach despues cu el a resisti su avancenan sexual y despues a pone su curpa den lama, segun documentonan di corte.
“Nos a pidi Departamento di Husticia Mericano pa e dossier di corte, transcripcion y tur e documentonan relaciona na e investigacion,” segun Ann Angela, vocero di OM na Aruba, a skirbi den un email. El a bisa cu ta bay “revisa y analisa esakinan prome cu dicidi riba e stapnan procedural pa tuma contra Joran van der Sloot.” El a agrega cu investigacion riba desaparicion di Holloway na Aruba ainda ta habri.
E statuut di limitacion pa e asesinato no planea di un persona na Aruba ta 12 aña. Holloway a fayece 18 aña atras. Merca no tin hurisdiccion pa enhuicia Van der Sloor pa un crimen cu a sucede na Aruba.
Dialuna, Van der Sloot, 36, tabata ainda den e prison na Alabama unda e ta deteni durante e huicio na Merca. Como parti di e acuerdo di culpabilidad, e sentencia di 20 aña pa extorsion ta bay core concurente cu su sentencia di prison andando na Peru pa asesinato di Stephany Flores Ramirez, pues e lo sirbi tempo adicional solamente si e keda liber prome cu 2043. Ta bay manda Van der Sloot back na Peru pa completa su sentencia eynan.
