A transcuri 4 aña caba cu Nacionnan Uni a introduci e agenda 2030 pa desaroyo sostenibel. E agenda ta consisti di 17 meta di Sustainable Development Goals conoci popularmente como e SDG. Pero con leu Aruba ta bayendo pa logra e SDG aki 11 aña?

E Comision Nacional di SDG y Fundacion 360 Degrees Innovation ta dos instancia cu ta trahando den colaboracion cu otro, pero tambe cu otro instancianan pa e metanan aki por bira un realidad. Mark Croes, kende ta forma parti di e Comision Nacional SDG a elogia e esfuerso cu instancia di e sector priva, manera di BAZ-RRR Galleria & Brasserie, ta bin realisando pa informa y educa nos comunidad tocante e obhetivonan global aki. Tambe e miembronan di e comision nacional ta trahando riba e mesun proposito aki. Nan tin un grupo cu ta pone atencion specifico riba e metanan di SDG den nos comunidad.

“Poco poco nos ta bayendo un tiki mas dilanti”, Croes a bisa.

Encuanto con leu Aruba ta pa logra e metanan di SDG, Croes tabata masha positivo. E ta haya cu Aruba, compara cu otro paisnan den Caribe, ta riba bon caminda. “Den Caribe nos ta hopi bon para”, el a declara na Bon Dia Aruba.
Sinembargo, tin otro paisnan den nos region, manera Jamaica y Trinidad, cu ta esunnan cu ta pushando pa SDG y nan ta un tiki mas leu cu otro paisnan Caribense.

Ta bezig awor trahado riba e video pa asina bin cu nan den nos comunidad y tambe den scolnan, pa nan tur ta mas atento riba SDG y con nan ta bayendo. P’esey nan ta aplaudi e tipo di iniciativa cu ta yuda pusha kico ta SDG y tambe e conceptonan mas importante di sostenibilidad.

Dos meta di SDG tin di haber cu Igualdad di Genero, cu ta e meta number 5 y esun di un Comunidad Sostenibel cu ta number 11. Croes ta haya cu e obhetivonan aki ta importante den diferente tipo di comunidad y cada un ta hunga un rol particular. El a indica cu cada pais ta mas avansa den algun di metanan di e agenda global.

Na Aruba tambe nan ta evalua, den e seno di nan comision, cual di e metanan aki ta mas relevante pa nos. Tur ta importante pa traha riba nan -segun Croes- pero tambe nos tin cu mira e realidad di nos capacidad financiero ta limita. Pero di otro banda, nos no tin hopi personal. Ta asina cu den e comision mes, nan tin cu wak cual di e metanan aki nan ta duna mas prioridad.

Di e 17 obhetivo, algun di nan ta wordo pusha mas na Aruba. Nan ta haci hopi enfasis riba number 3, relaciona cu Salud y Bienestar y number 8 relaciona cu Trabou Decente y Crecemento Economico. Pero igualmente nan ta combina hopi di nan, ya cu ta wordo considera e aspecto social como uno hopi importante di SDG. Tambe mester balansa e aspecto economico cu ta hopi importante, pero nunca e mester bay a costo di e aspecto di ambiental.

Croes a indica cu SDG tambe ta percura y pone atencion pa no tin un meta cu ta bay a costa di otro. Nan ta purba di balansa e pilar di sostenibilidad cu ta e hendenan, planeta y prosperidad lo miho posibel.

 

360 Degrees Innovation

 

Blanca Pietersz di 360 Degrees Innovation tabata un di e oradornan invita pa duna un charla tocante un di e metanan di SDG. Ta trata di e meta di Igualdad di Genero of number 5.

Pietersz tabata masha contento no solamente di por papia riba e meta specifico aki, sino riba e beneficionan di SDG pa sector comercial na Aruba. E ta haya cu BAZ-RRR ta un ehempel perfecto di esaki, ya cu e ta considera cu loke su gerente, Joase-Ann van der Biest ta bin haciendo, trahando cu e SDG y promoviendo nan, ta algo di aplaudi.

El a bisa cu SDG ta un plataforma na nivel mundial y ehecuta pa Nacionnan Uni pa asina e paisnan por traha riba nan. No solamente pa e sector publico, sino cu nan ta relaciona cu e sector priva. Pietersz su perspectiva ta bini for di sector di innovacion, uzando innovacion como un catalisador pa genera cambio sostenibel.

E ta haya cu Aruba ta bayendo riba un bon caminda pa logra e SDG, pero ainda nos por haci mas. Un di e 17 meta tin cu haci cu ‘No Pobresa’ cu ta e number 1, y e reflexion ta: Kico nos por haci riba e tereno aki na Aruba. Pero tambe e number 2 cu tin di haci cu ‘Cero Hamber’ y con nos tur por tin cuminda ariba nos mesa. E ta haya cu nos tur mester cera cabes pa nos por logra e metanan aki di e miho manera na Aruba.

El a elogia e trabou cu e Comision Nacional di SDG ta bin realisando pa implementa e metanan na Aruba. Tambe nan ta purbando di logra esakinan den nan propio fundacion 360 Degrees Innovation y den nan trabou regular. Pero tambe compartiendo informacion cu e sector publico y priva riba e beneficionan cu SDG lo trece den nan respectivo sectornan. Pa ehempel el a referi cu si un compania ta inclui SDG denter di nan plan, ta resulta mas facil pa nan por tin acceso na cierto fondo of garantia.