‘Aruba ta responsabel pa siguridad di avionnan Insel grounded’

E decision pa ground e avionnan despues incidentenan unda ta falta di siguridad, ta cay bou responsabilidad di e autoridad di aviacion civil di Aruba y no di Corsou.

Esaki Autoridad di Aviacion Civil Corsou, esta CCAA a declara ayera ora di tuma nota di e comunicado di e consulado Mericano na Corsou riba e prohibicion pa su personal bula cu vuelonan di InselAir. Manera Bon Dia Aruba a trece ayera esaki tabata basa ariba dos incidente recien riba 27 di december y 13 di januari unda presion di aire den e cabina a baha y e avionnan mester baha urgentemente. E decision pa ground e avionnan concerni tabata uno cu Autoridad di Aviacion Civil di Aruba a tuma como cu e avionnan ta registra na Aruba. Nan ta registra riba nos isla cu un permit economico y cu certificado pa operacion aereo (AOC) di Aruba. “Esaki ta nifica cu e Autoridad di Aviacion Civil di Aruba ta responsabel pa supervision di siguridad di e avionnan aki”, asina e autoridad na Corsou kier clarifica.

Bon Dia Aruba ta purbando di haya e autoridad Arubano pa duna un splicacion mas amplio sinembargo no ta logrando. Ayera nos ta haya sa cu e director di Autoridad di Aviacion Civil di Aruba tabata na su coleganan na Corsou pa papia over di e asunto di InselAir.

E autoridad di Corsou no ta descarta completamente su responsabilidad pa e siguridad di e avionnan di Insel. Nan ta bisa cu: “Naturalmente CCAA tin su propio responsabilidad y ta haci su inspeccion den forma di ramp checks di e avionnan registra na Aruba.”

E avionnan concerni ta e MD-80 nan cu te ainda nan mester riba tera. Na total e autoridad Arubano a ground 6 avion di InselAir. E autoridad di Corsou ta bisa cu e otro avionnan registra na Corsou (3) ta den operacion. Sinembargo nan ta wordo controla continuamente den cuadro di e programa di vigilancia intensivo di CCAA, caminda den dos (2) turno di warda diariamente e inspectornan  ta bay  na aeropuerto pa check tur vuelo di InselAir. Si tin deficiencia, esaki ta keda coregi prome cu e siguiente vuelo. Sino e avion ta keda tera’, asina e autoridad na Corsou ta bisa.