Segun un rapport publica pa Fitch Ratings, e agencia financiero a eleva e rating di Aruba, despues cu na 2020 a bah’e na ‘junk’, bisando cu debe di Aruba ta bahando y e reserva stranhero ta halto.
Den su rapport, Fitch a indica cu a mehora e ‘Long-Term Foreign-Currency Issuer Default Rating’ na ‘BBB-’ cu un Positive Outlook. “Esaki ta refleha progreso significante pa reduci debe di gobierno, sosteni pa surplus fiscal halto y gobernacion fuerte.
“Economia di Aruba, impulsa pa turismo, a crece cu 6,8 porciento na 2024, cu crecemento futuro cu nod ta spera ta bay modera.”
E agencia a continua bisando cu e marco fiscal, reforsa pa sosten di Hulanda, ta inclui metanan pa surplus presupuestario y reduccion di debe. “Surplus den cuenta coriente di Aruba y aumento di reserva internacional ta reforsa su stabilidad financiero. Sinembargo, nivel halto di debe y dependencia economico riba turismo ta presenta riesgo.”
Fitch ta nota cu e ratio di debe pa GDP di Aruba a baha na 66 porciento aña pasa, for di un peak di 100 porciento na 2020, y ta spera di baha na alrededor di 57 porciento pa proximo aña. Tambe tin un aumento den reserva internacional danki na e surplusnan den cuenta coriente, cu e reservanan internacional alcansando 1.8 biyon dollar na 2024 y ta spera cu lo alcansa 2.6 biyon proximo aña, segun Fitch.
Toch e agencia a adverti cu e peso di debe di Aruba ta keda halto, y esaki ta nifica cu nos economia, dependiente riba turismo, ta keda vulnerable pa shocknan externo.
Di su banda, S&P Global Ratings y Moody’s a cualifica e grado di inversion na BBB y Baa3, respectivamente.
