Dia 26 di juni 2024 a tuma lugar e Justitieel Vierpartijenoverleg (JVO) na Hulanda (Europeo). Minister di Husticia y Seguridad Hulandes, David van Weel, a dirigi un carta pa Tweede Kamer den cual e ta informa, den nomber di e Secretario di Estado di Asuntonan Interno y Relacionnan di Reino, tocante e liñanan principal di e reunion entre e cuater paisnan di Reino.
E JVO ta e reunion semestral entre e cuater minister di Husticia di Aruba, Corsou, Sint Maarten y Hulanda. E meta di JVO ta contribui na un manera efectivo y cooperativo pa aborda asuntonan di husticia den Reino.
Minister van Weel ta remarca cu Hulanda tin un cooperacion intensivo cu e paisnan den area aki y ta traha duro pa duna e cooperacion un forma activo y JVO ta un foro importante pa esaki. El a agrega cu e ministerio di Husticia y Seguridad ta responsabel pa e cadena di husticia den Caribe Hulandes y e dialogonan na JVO tocante cooperacion regional entre e diferente isla ta relevante pa motibo di e cadena chikito di e parti aki di Hulanda.
A mandatario ta splica cu durante e JVO di juni 2024 a pidi atencion nobo pa e desbalansa nota den e cadena di refuerso di ley den e parti di Caribe di Reino. Siguiendo e JVO di januari 2024 – y conforme cu e acuerdonan – e grupo di trahado di JVO a traha riba un analisis di problema cu ta inclui shete recomendacion pa mitiga e cuestion di desbalansa.
E shete recomendacionnan aki ta: desaroya un toets di ehecucion pa por calcula miho e efecto di un proyecto of intensificacion riba e cadena y aumenta e efectividad; traha acuerdo tocante apoyo na e comienso di proyectonan nobo di cooperacion; realisa un analisis di tareanan esencial pa cada un di e servicionan den e cadena di refuerso di ley; busca espacio pa inversionnan cu ta wordo haci cu bista riba e landspakket; tuma decisionnan strategico pa medio di plan di admision di personal; explora e oportunidadnan pa miho cooperacion regional entre e paisnan di Reino den e area di refuerso di ley; y tene un dialogo mas strategico den JVO.
Cu e recomendacionnan aki, e mandatario Hulandes ta indica den e carta, e grupo di trabao di desbalansa a cumpli su tarea y aworaki e cuater paisnan a forma un grupo di trabao nobo pa desaroya y monitor e ehecucion di e recomendacionnan. Aruba lo presidi e grupo di trabao aki.
For di e relacionnan constitucional, ta sali na cla cu e refuerso di ley ta un asunto nacional. Pa yega na un miho cooperacion den e cadena y pa un participacion efectivo di Hulanda den e area aki, ta importante pa e desbalansa cu a surgi ta ser aborda conhuntamente.
E diferencianan di capacidad entre cierto servicio di refuerso di ley conhunto – manera e Recherchesamenwerkingsteam y e Koninklijke Marechaussee, caminda Hulanda a inverti – y servicionan local – por ehempel, e cuerponan policial local y e institucionnan di detencion – por lanta un situacion caminda mas hopi caso criminal no ta haya siguimento den e cadena. Esaki, minister van Weel ta remarca, tin consecuencia pa henter Reino.
Durante e JVO, Hulanda, apart di e atencion riba e cuestion di capacidad – a indica oportunidadnan di conexion riba otro temanan di estado di derecho, manera bon gobernacion, integridad y fortalecemento di e sector social.
Den e carta e mandatario ta subraya cu ta crucial pa Reino completo combati actividadnan criminal cu ta mina e sistema y pa tuma accion efectivo contra e actividadnan criminal desestabilisador na Aruba, Corsou y Sint Maarten.
Saliendo for di e pensamento aki, desde juni 2021, e grupo di trabao Bestuurlijke Aanpak Ondermijning ta activo. Den e ultimo añanan, e grupo di trabao aki a enfoca principalmente riba organisa encuentronan pa desaroya conocemento y realisa proyectonan. Por ehempel, na comienso di e grupo di trabao, un analisis di problema pa cada pais, incluyendo Aruba, a ser elabora, e paisnan a cuminsa na 2023 un trayecto conhunto pa yega na un strategia di comunicacion comparti pa campañanan di conscientisacion y diferente ‘seminario di Reino’ a tuma luga.
E paisnan ta conclui cu e metodo aki tin un efecto positivo riba e reduccion di e actividadnan cu ta mina e sistema. Mirando e resultadonan logra, ta examina si e trabao di e grupo di trabao por expande pa inclui Caribe Hulandes. Actualmente den e presupuesto di BZK a libera fondo pa tratamento den e paisnan autonomo di Reino. Lo examina si den e presupuesto tin espacio pa e participacion di Boneiro, Sint Eustatius y Saba den e grupo di trabao.
Minister van Weel a resalta cu e ministernan cu ta envolvi a tuma nota di e progreso di e Plataforma di Subversion di e area di Caribe, unda riba nivel strategico ta buscando cooperacion pa un enfoke cu ta trata henter e cadena di crimen cu ta mina sistema y ta pasa frontera den parti di Caribe di Reino.
Desde su formacion na juni 2023, e plataforma aki a topa cinco biaha, unda ta duna atencion na coordinacion di red y un cooperacion den cadena cu ta enfoca riba inventarisa e capacidadnan di crimen.
E JVO a conclui cu e contenido y enfoke di e plataforma ta acopla bon cu e practicanan real. Atencion specifico a ser pidi pa un enfoke preventivo di e crimen dentro di e plataforma, banda di e enfoke administrativo y represivo.
Pa loke ta e Ley di Reino tocante Extradicion Aruba, Corsou y Sint Maarten, e mandatario Hulandes indica cu extradicion ta un extradicion segun e Statuto di Reino Hulandes. Pa Aruba, Corsou y Sint Maarten, e reglamentonan aki ta fiha den e Decreto di Extradicion di Aruba, Corsou y Sint Maarten.
Riba 1 di januari 2024, un cambio den e Statuto a drenta na vigor. E cambio aki tin entre otro como efecto cu reglamentonan tocante asuntonan di Reino mester ta estableci for di of via un ley di Reino. Pa e casonan caminda reglamentonan relaciona cu asuntonan di Reino ainda no ta estableci den of via un ley di Reino, mester tuma medidanan den cuater aña despues di e fecha cu e cambio di e Statuto a drenta na vigor.
Mirando e hecho cu e Decreto di Extradicion no ta basa riba un ley di Reino, esaki ta nifica cu e reglamentonan pa extradicion pa Aruba, Corsou y Sint Maarten mester haya un base nobo. Pa garantisa continuidad di e ley di extradicion cu ta existi y pa no carga e practica di ehecucion den e paisnan Caribense di Reino mas di loke ta necesario, e mandatario Hulandes ta remarca cu ta logico pa establece e reglamentonan di e Decreto di Extradicion den un ley di Reino. E minister di proteccion di derecho e tempo ey a splica e consecuencianan aki den e JVO di januari 2024.
Durante e JVO di juni 2024 a haci acuerdo riba e progreso di e trayecto aki. Un grupo di trabao nobo di JVO lo cuminsa traha riba esaki.
