Ayera mainta durante un conferencia di prensa di Gobierno di Aruba Prome Minister, Evelyn Wever-Croes, a anuncia e publicacion di e rapport di evaluacion di Aruba su sistema di combatimento di placa y financiamento di terorismo y tambe a informa cu Aruba a pasa e evaluacion aki di forma excelente.

Wever-Croes a indica cu e tema di labamento di placa y financiamento di terorismo (AML-CFT, Anti-Money Laundering and Counter-Terrorist Financing) ) Gobierno di Aruba semper a dedica atencion necesario pa pone e dos puntonan aki hopi halto ariba agenda y di e forma aki el a anuncia cu Aruba a pasa den un evaluacion di e instituto Caribense internacional CFATF cu un grado di excelencia. “Ayera nos a haya e bon noticia cu Aruba, segun nan, tin un regimen di AML-CFT excelente y nos mester ta hopi orguyoso di esaki”, el a bisa.

E mandatario ta splica cu desde 2017 cu Gabinete Wever-Croes ta den gobierno nan ta trahando cu un stuurgroep di ALM-CFT cu ta wordo lidera pa Minister President hunto cu tur e profesionalnan cu ta asisti Gobierno di Aruba den esaki pa enfoca ariba e tema di labamento di placa y financiamento di terorismo.

Ministerio Publico, Financial Intelligence Unit (FIU), DWEZ y Banco Central di Aruba ta e institutonan cu mas atencion a dedica na coordina e trabounan, pero tambe hunto cu hopi instituto na Aruba, tanto den sector publico, semi publico como priva.

“E evaluacion aki no a bin di su mes, e tabata un esfuerso enormemente grandi di hopi hende den sector publico, sector semi publico y sector priva”, Minister President a agrega.

E proceso

Den añanan 2018 te 2020 gobierno a cuminsa cu un National Risk Assessment (evaluacion nacional di riesgonan) di labamento di placa y financiamento di terorismo na Aruba. Esaki ta un metodologia, un herment di World Bank, e mandatario ta splica, cu ta wordo usa pa haci un evaluacion di con fuerte e sistema ta.

Esaki a wordo realisa entre 2018 y 2020 cu e sector publico y priva den preparacion pa e evaluacion CFATF. Gobierno di Aruba a cambia tambe e ley LWTF (Landsverordening voorkoming en bestrijding witwassen en terrorismefinanciering) na 2021.

E preparacionnan mes pa e evaluacion a cuminsa alrededor di 2018. Aruba mester a wordo evalua na 2020 pero debi na e pandemia di Covid a wordo posponi pa 2021. Durante e periodo aki Aruba mester a manda hopi informacion na CFATF, mester a manda documentonan indicando con e leynan di Aruba y ehecucion den practica ta dirigi pa combati labamento di placa y financiamento di terorismo.

Minister President a sigui splica cu despues di esey e grupo mes di CFATF cu a evalua Aruba a bin pa haci nan bishita personal den e periodo di 30 di augustus te 10 di september 2021. E ekipo di evaluacion cu a bin Aruba personalmente a reuni cu tur stakehodler di sector publico y priva pa scucha con e practica ta y pa controla si esey ta di acuerdo cu e documentonan cu a manda prome y pa evalua si ta suficiente.

Unabes cu e bishita a keda cla a sigui pa e proceso di e rapport mes y esaki a wordo traha den concepto cu e ekipo di evaluacion a traha. E rapport a wordo manda Aruba pa repasa y hasta tabatin reunionnan riba e contenido di e concepto di e rapport pa asina trata e conclusionnan di e ekipo di evaluacion.

Segun Wever-Croes a indica esaki a tuma luga den lunanan di mei y juni di e aña aki y ariba dia 2 di juni tabatin e reunion plenario cu a tuma luga via Zoom y durante e reunion aki e rapport a wordo aproba finalmente.

Pero despues di esey ainda e proceso no tabata full cla pasobra despues di e reunion plenario nan a ta repasa, check di e calidad y consistencia internacionalmente na unda nan no ta wak Aruba so pero ta compar’e cu otro paisnan den situacionnan similar.

“E resultado di esaki, un hopi bon noticia, ta cu ningun otro pais tabatin nada mas di agrega na e rapport y asina e rapport a wordo aproba pa loke ta calidad y consistencia. Diaranson e siman aki gobierno di Aruba a haya e bon noticia cu e rapport a wordo aproba y a wordo publica diahuebs dia 14 di juli y Aruba por comunica e resultadonan di esaki”, Minister President a remarca.

Aruba a sali na segundo luga den henter Caribe pa loke ta e evaluacion di CFATF. Bermuda ta na prome luga y den nan evaluacion tabata e miho.

Wever-Croes a gradici Banco Central di Aruba cu a yuda gobierno financia e National Risk Assessment, cu ta e metodologia di World Bank cu Aruba a aplica ya cu sin esey no por a detecta na tempo kico ta e riesgonan y kico mester traha riba dje.

Minister di Finanzas y Cultura, Xiomara Maduro a splica cu na 2009 Aruba pasa den su ultimo evaluacion pa CFATF y e tempo ey e resultado no tabata bon pa pais Aruba. Esey a hiba a pone gobierno den un situacion unda cu cada biaha mester a reporta ariba e avancenan cu a wordo logra durante tur e añanan despues pa demostra CFATF cu Aruba a tuma esaki na serio y cu e integridad financiero di e pais ta algo cu ta wordo traha di forma serio riba dje.

“Mester bisa cu e esfuerso di e momento eynan, e momento cu a haya e rapport na 2009 pa aworaki, e esfuerso grandi a keda logra y awe por ricibi e bon noticia aki cu un biaha mas Aruba a demostra ora cu nos pone cabes hunto, ora cu nos tin e bon intencion y ora cu tin un bon liderazgo ariba e temanan aki, sigur integridad financiero di nos pais ta keda salvaguardia”, Maduro a indica.

El a subraya u e resultado di e evaluacion ta duna tambe un señal fuerte na e inversionistanan cu na Aruba nan placa y nan inversion ta sigur y esaki, el a comenta, sigur ta yuda den e retonan cu Aruba tin su dilanti.

Por ultimo Minister Maduro a gradici specialmente e secretariado di CFATF na Aruba cu a haci un trabou importante y tambe tur e stakeholders cu a yuda, tur e departamentonan na Aruba cu a yuda cu nan esfuerso. “Hopi di nos no sa di nan trabou pasobra hopi trabou ta wordo haci tras di cortina, pero e trabou aki ta un trabou cu nos como pais tin cu balora pasobra danki na nan esfuerso di cada dia awe pais Aruba por ricibi un bon rapport cu ta bisa cu Aruba su sistema financiero ta uno cu integridad halto”, el a finalisa.