Pa medio di un comunicado, e presidente saliente di College financieel toezicht (Cft), Age Bakker ta splica riba e retonan cu Aruba ta enfrenta cune. E colegio di supervision financiero di Aruba (CAft) ta urgi gobierno di Aruba pa considera na decreta di awo caba un stop na obligacion y un stop na vacaturanan. Den e prome reportahe di ehecucion di e aña aki ta sali na cla cu e deficit financiero di e sector colectivo na Aruba den e prome kwartaal ta di 1,1% di e PIB, loke ta mas halto cu e norma di deficit legal pa henter aña, esta di 0,5% di e PIB. No solamente e entradanan di impuesto di e prome kwartaal ta decepcionante, sino tambe e entradanan di e medidanan di saneamento, mientras cu e efectonan spera di reapertura di e refineria ta laga warda riba nan, pa motibo di e retraso cu a presenta, segun e comunicado ta bisa.
Resultadonan decepcionante di e prome kwartaal CAft ta señala cu particularmente e entradanan di impuesto riba salario y esunnan di BBO ta atrasa respecto di e presupuesto. E medidanan imponi door di gobierno pa mehora cumplimento cu ley (compliance) na servicio di impuesto ainda no ta surti e efecto aspira. Banda di esey, e trabounan retrasa na e refineria tin como resultado cu un gran parti di e inversionnan ta bay tuma luga mas despues den aña, loke tin un efecto di retraso riba e entradanan fiscal. Pa loke ta e gastonan, ta parce cu e medidanan di saneamento formula pa gobierno, cu ta necesario pa logra finansa publico duradero, ta disparce fo’i bista. E Colegio ta enfatisa cu ta importante pa realisa e entradanan presupuesta di 67 miyon florin, acumula a base di e suma di compensacion di Valero (27 miyon) y benta di Fuels Marketing & Supply Aruba (40 miyon) efectivamente e aña aki.
Trabou tin
Segun e comunicado ta bisa, e resultadonan financiero di e prome kwartaal ta di tal naturalesa cu Colegio ta conseha pa implementa un stop di vacatura y un stop di obligacion. Presidente di CAft: “E gastonan di personal ta monta na casi un di tres parti di tur e gastonan di gobierno e aña aki y ta obligatorio pa reduci nan. Kiermen, tin trabou pa haci!” Den e prome lunanan di e aña aki mas persona a drenta den servicio di gobierno, loke no ta di acuerdo cu proposito di gobierno pa spaar 5% anualmente riba personal di gobierno. Pa laga e gastonan publico baha ainda mas, lo mester bin cu un miho anticipacion presupuestario pa loke ta frecuencia y haltura di e compensacionnan pa overtime pronosticabel. Banda di esey fihamento di un ‘plan di funcion’ (functiehuis) pa empleado publico por contribui na combatimento di crecemento autonomo di e gastonan di personal. Pa loke ta trata impuesto, un revision mas profundo di e sistema fiscal ta necesario y tambe mester fortifica e posicion di likides di Pais Aruba structuralmente. Ministro di Finansa hunto cu otro sector den gobierno mester dal stap na caminda pa obtene un declaracion aprobatorio di accountant. E siguiente stap den esaki ta formulacion di un planificacion di tempo concreto y realistico.
Ultimo bishita di e presidente actual
Ademas di tabata den cuadro di deliberacion tocante e resultadonan di e prome kwartaal, e bishita aki tabata tambe den cuadro di e proximo despedida di e presidente actual Age Bakker dia prome di juli 2017 y di ceramento conoci cu e proximo presidente Raymond Gravus. E presidente saliente ta wak atras na un colaboracion exitoso cu Aruba. Age Bakker ta bisa referente su periodo na CAft: “No semper tabata facil, pero hunto, cada ken for di su propio representacion, nos a contribui pa Aruba por a cumpli cu e norma di deficit legal e ultimo dos añanan. Consecuentemente, a dal stap importante pa restringi atrobe e posicion di debe insostenibel.” Manera di custumber durante e bishitanan di Colegio na Aruba, a tene combersacion cu Gobernador, Ministro di Finansa, Conseho di Ministro y e Comision di Finansa, Asunto Economico y Organisacion Gubernamental di Parlamento. Tambe CAft a haci un bishita na Banco Central di Aruba. Den e combersacion ey a bin padilanti, entre otro, e actividadnan retrasa di e refineria.
