Despues cu Gobierno di Aruba hunto cu Crisis Team a dicidi di habri scol, na e momento cu Aruba tin e maximo cifra di casonan di Covid-19 desde cu a virus a yega na maart, parti di ciudadanonan cu Bon Dia Aruba a entrevista a expresa cu na e momentonan aki, no ta un bon decision pa laga muchanan bay scol.

Bon Dia Aruba a sali riba caya pa entrevista ciudadanonan y haya nan opinion tocante e tema aki. Por ehemplo, Josefa Maduro a expresa cu esey ta un riesgo cu gobierno ta tuma pa motibo cu ta nifica un menasa pa e muchanan. “Nan ta mucha, nan no ta worry” cu e medidanan contra coronavirus, contrario cu hende grandi cu ta cuida; y e casonan ta aumentando hopi.

Javier Arrieta a expresa pa Bon Dia Aruba cu e decision aki no ta bon. “Tur caminda tin coronavirus, pa habri scolnan no ta bon, pasobra e mucha ta infecta di biaha. Gobierno tin cu cuminsa habri scol poco a poco y no tur muchanan bay di biaha. Pone un regla pa nan.”

Otro persona cu tambe a duna su opinion ta Maria Araujo, ken a bisa cu e como mama no ta di acuerdo pa habri scolnan, pa motibo cu esey ta nifica un peliger. “Muchanan no tin e mesun precaucion cu hende adulto tin pa cuida. Sscol ta importante, pero e bida ta mas importante”, el a declara.

Mila Gomes, cu ta un studiante, a menciona cu e situacion aki ta fastioso pa motibo cu e casonan di Covid-19 ta hopi. E ta puntra su mes con nan ta bay haya nan lesnan online, y e ora ey pakico nan mester bay scol. “Nos por contagia otro, nos por contagia hende na cas, e ta bira un situacion hopi dificil. Mi kier caba mi scol y mi ta prefera di hacie on line y asina nos cuida nos mes tambe”, Gomes a sigura. Tambe el a trece dilanti cu su mama a cumpra su bukinan y a paga full, “personalmente mi no kier bay scol pa mi por haya e virus y contagia mi famia”.

Maria Aquino a conta Bon Dia Aruba cu e ta kere cu “no ta apropia pa habri scol e momento aki, pa motibo cu ora muchanan ta bay scol, por sucede cu nan ta bin contagia nan famia na cas”. Agregando cu “vooral esunnan mas chikito, mi tin nieto y mi no kier pa e por wordo contagia”, el a comenta.

Di e manera aki, redaccion a haya e opinion di algun persona, cu den su mayoria ta pensa cu na e momentonan aki e muchanan ta den riesgo di por wordo contagia cu e virus. Tambe ta existi casonan ‘asintomatico’ na unda e persona ta contagia, pero no ta sinti sintoma; y muchanan no ta exclui di casonan asina. Te ainda no por garantisa si habrimento di scol lo sucede na 100% den scol of un parti tambe via online, mayornan ta wardando e decision di gobierno y Crisis Team a siman aki.