Aruba ta ocupa puesto number uno ariba lista di mundo pa mas refugiado pa cada habitante

Durante siman, e portal di noticia Hulandes Nieuwsuur a reporta cu Aruba ta ocupa puesto number na mundo den ricibi refugiadonan, esaki na momento cu calcula e cantidad di refugiado basa ariba e cantidad di habitante na un pais. E portal ta menciona cu na Aruba 1 di cada 6 habitante ta un refugiado.

E noticia ki ta genera algun pregunta importante, sobretodo den e parti financiero ya cu cada refugiado cu yega Aruba ta implica gasto y hopi di nan no tin e manera pa paga servicionan basico. Ken ta paga pa esaki?

E Tratado Internacional di Refugiado bo ta obliga tur pais pa cumpli cu cierto exigencia na momento cu acepta refugiado na e pais. Un di nan ta pa duna hende hospedahe, di dos ta pa duna nan cuminda, coy bebe, acceso na servicio di salubridad publico etc. Fuera di esey mester percura tambe cu nan tambe tin manera di paga cierto gasto nan mes y si tin mucha envolvi, nan tin cu bay scol.

Na Aruba, en bes di hinca e refugiadonan den un campo, manera tabata haci na Corsou cu nan tabata den un estilo di prison, ta permiti pa nan wordo ricibi den cas di hende local, sea ta famia of conoci. Sinembargo, a diferencia di Corsou, Aruba si a firma e Tratado Internacional di Refugiado, loke ta nifica cu Aruba ta comprometi na cierto exigencia cu mester cumpli pa cu trato di refugiado.

Segun tratado internacional, y segun ley di leerplicht, si tin mucha refugiado den edad di bay scol, e mester wordo acepta na scol. Pero ta un realidad tambe cu cualkier mucha cu bay scol mester paga pa por bay scol, e pregunta ta; for di unda e placa ta bin pa e muchanan refugiado por paga scol?

Gasto di cuido medico pa refugiado tambe tin su pregunta. Si un refugiado yega hospital, ta obligatorio pa ser atendi, pero e persona aki no tin manera pa paga esaki, ken ta paga e gasto? Hospital. Y esaki na su turno ta bay riba cuenta di AZV. Gobierno te awo no a duna ningun indicacion con ta atendiendo cu esaki den su plannan di presupuesto.

Na Aruba tin hopi fundacion cu ta brinda ayudo y asistencia na refugiado. Tin diferente programa pa refugiado pa cual ta bin subsidio for di exterior pa yuda e refugiadonan, pero esaki no kiermen cu ta cubri tur gasto necesario. Pero e responsabilidad final pa cumpli cu tur e compromisonan aki ta keda na gobierno.