Diamars pasa, na auditorio di Colegio EPI a presenta e evento internacional Erasmus+, cu e celebracion di e dia #ErasmusDays2019. Desde aña 2017, bou iniciativa di e agencia nacional di Francia encarga cu desaroyo y ehecucion di e programa di subsidio di Union Europeo Erasmus+, Europa y mundo ta celebra anualmente e logronan di e proyectonan subsidia cu e fondo aki.

Considerando e exito grandi cu Aruba ta hibando como un Pais-Teritorio di Union Europeo cu e subsidio aki, a dicidi di organisa den cuadro di #Erasmusdays 2019, un evento informativo pa tur e cabesantenan y directivanan di scol, cu a tuma luga diamars pasa.

Bou e presentacion di Gerlien Croes, Policy Oficial Office di EU & Kingdom Relations, a splica cu departamento di relacion di Union Europeo y Reino a dicidi pa prome biaha pa organisa un encuentro cu tur e docentenan, maestronan y cabesantenan di scol, cu e idea cu nan lo hiba informacion na nan scolnan tocante Erasmus+.

Croes a expresa cu Union Europeo tin tres aña caba cu ta organisa e celebracion aki, pa loke ta tur e logronan di e proyectonan subsidia cu e programa Erasmus+. Esaki ta un subsidio di Union Europeo cu Aruba tin tur acceso na dje oficialmente desde 2014 y ta crea oportunidad pa proyectonan pa hobennan, pa educacion y pa deporte.

Croes a informa cua ta e oportunidadnan cu e subsidio aki ta crea. Por ehempel mobilidad pa tur staf di scol, mobilidad pa alumnonan of crea parternan strategico cu scolnan na Europa of na un pais reconoci na Union Europeo, unda cu tambe por desaroya un proyecto hunto pa asina crea oportunidad pa scolnan.

Tambe a destaca cu e programa ta inclui e oportunidad pa studiantenan, desde muchanan cuminsando na kleuterschool te cu edad mas halto, pero tambe pa staf en general di tur scol. Den caso di Aruba, e ta lider di loke ta Erasmus+ desde 2014, cu a yega na posibilidad pa haci uzo di esaki. Un parti strategico tabata Universidad di Aruba, cu a haci hopi bon uzo di e subsidio, te cu awor cu tin un miyon euro na subsidio ricibi cu e proyectonan ehecuta.

Considerando cu e ciclo financiero di Union Europeo di 2021 pa 2027 lo redobla e cifra na 30 miyon euro Croes a comenta cu e idea ta pa cuminsa prepara desde aworaki, pa desde 2021 tin mas proyecto canando pa Aruba.

Asina mes, el a sigura cu e programa ta reparti na diferente accion y cada actividad ta indica cua tipo di partner ta complementa cu e proyecto pa duna sosten. Loke ta importante aki ta cu no necesariamente scol mester haya un partner cu ta un scol di afo, por ta tambe cu por haci un proyecto pa mobilidad, pero cu un compania of organisacion di afo, cu e empresa por duna un entrenamento di desaroyo profesional. Esey ta depende di e necesidad di scol of organisacion.

Di su parti, Annemarie Proveyer-Groot, director di Departamento di Enseñansa di Aruba, a duna di conoce cu e programa aki ta duna oportunidadnan pa eherce e Plan di Educacion Nacional. Den e plan ey tin diferente meta poni cu nan kier logra pa aña 2030.