Segun sra. Arends-Reyes recientemente pais Aruba tawata anfitrion di Florida – Caribbean Cruise Association su Platinum Associate Member Advisory Council Conference (PAMAC). Un conferencia cu a trece hunto hopi di e topnan di e industria y locual cu nan a reconfirma ta e calidad, inversion y vision cu pais Aruba tin pa cu nos pilar economico cu ta Turismo. PAMAC ta un di e conferencianan mas grandi y importante di e industria crucero pa e mercado Norte Americano y Latino Americano.
Na luna di mei por a tuma nota di un aumento drastico di nos bishitantenan cu ta yega cu barconan crucero. Aruba a conoce un aumento di mas cu 152.9% den number di bishitante compara cu Mei 2016 di 20,462 pasahero na 51,756 pasahero den mesun temporada na 2017. E ‘calls’ a incrementa cu 11 calls mas. E aña aki tin 19 calls na mei 2017 compara cu 8 calls so na mei 2016. Tambe tawata un momento grandi pa Aruba na momento cu Disney Fantasy a yega e waf di Aruba. Nos sa cu Disney Cruise lines ta un liña di crucero sumamente popular y cu ta masha exitoso.
Aruba ta trahando sumamente duro ariba e ampliacion di facilidadnan pa nos haya mas barco y barconan mas grandi. Esaki lo ta inversionnan multimiyonario cu ta parti di e masterplan di Aruba Ports Authority. Den region tambe ta trahando duro ariba drecha e infrastructura y facilidadnan pa asina por yega na canalnan mas hundo y amplio, piernan mas grandi y robusto pa por ricibi megaships y ta netamente den e cuadro aki Aruba tambe lo ta invertiendo den e facilidadnan aki pa percura cu nos por keda den topnan den Caribe como un destinacion popular y di calidad halto cu tin hopi pa ofrece na nos bishitantenan.
