E forma con secretario di estado Knops a vocifera opinion di gobierno Hulandes den un entrevista cu un portal di Curaçao, encuanto e proceso pa yega na acuerdo cu e islanan Aruba, Curaçao y Sint Maarten, conteniendo su mes y tratando pa mantene un vocabulario respetuoso, papiando di e propuesta ridiculo di gobierno di Aruba pa reduci e recorte riba salario di empleado publico y semipublico di 12,6%, riba su mes tabata bisa suficiente.

Pa un momento nos a haya un ‘flashback’ cu a hiba nos na 2014, tempo cu prensa Hulandes a entrevista premier Rutte tocante e huelga di hamber di su homologo Eman na Aruba y a puntra su opinion. “Mi ta prefera di no duna comentario pasobra e ora mi ta bay bisa cos cu mi lo lamenta despues”. Cu otro palabra: “Mihor mi mantene respet den e asunto idiota aki y keda keto”. Sin embargo, den e caso aki Knops a bay un tiki mas leu unda toch el a splica cu Aruba (gobierno) a caba di acorda cu Hulanda cu e 12,6% ta parti di e base pa e acuerdo pa haya e sosten di liquidez y cu ta incomprensible cu simultaneamente, mientras Aruba ta den problema financiero grandi, ta bin cu e tipo di propuesta aki cu ta…. mihor no oblig’e califica esaki…

E situacion aki ta un berguenza pa esnan cu a hiba e locura aki pa gobierno Hulandes, pero tambe pa nos cu ta representa na e nivel menos cu mediocre aki. Sin embargo, e problema no ta keda reduci na berguenza cerca cierto hende o falta di esaki cerca otro. Tur tres e islanan a ser manda cas cu ‘huiswerk’ o ‘strafwerk’ pa regla cos a corto plazo, pa por sigui papia cu Hulanda tocante e resto di e trayecto. Y aki no ta trata solamente di e sosten di liquidez, esey ta solamente e problema a corto plazo. Ta trata tambe di henter e trayecto di supervision financiero cu pa Aruba realmente a inicia na 2014 tempo cu gobierno di Hulanda a haya ta basta, cu Aruba tabata bayendo pa un abismo financiero, sin un señal di moderacion di parti di gobierno di Aruba di e tempo ey. Nos a pasa despues den varios aña di supervision flexible, por bisa simplemente slap, pero esey a cuminza cambia den ultimo añanan. E crisis di Covid-19 a bin crea un situacion di mas urgencia ainda, pero ora y si e crisis di Covid mengua, esey no ta final di e problemanan. Ta e ora ey nos ta keda confronta cu e desastre cu e crisis combina aki a laga atras. Y ta pesey lo mester traha riba mehoracion no solamente di situacion financiero di gobierno, sino di mehora operacion gubernamental completo, mas e reformanan cu ta permiti economia desaroya cu mas perspectiva.

Aunke lo ultimo aki a ser bisa, y ta bisa esaki awe ainda, cada rato nos ta bolbe na creacion di antagonismo cu Hulanda, como si fuera nan ta e gran culpable den henter e asunto aki. Manera Knops a splica simple y claramente den e entrevista menciona, tabatin un acuerdo caba na inicio di december encuanto e protocol cu mester renoba, y cu Aruba no a cana e proceso pa haya aprobacion pa e cambionan cu a bin den e proyecto di ley di Reino pa institui COHO. Aki ta parce cu e partido grandi den e coalicion atrobe ta haci uso di su caha di triki pa gana tempo, y posiblemente nos ta bay mira un repiticion di e protocol di november 2018, cu mester a haya un follow up cu cambionan den e ley di supervision financiero, crea bao di gobernacion di e otro partido grandi na 2015, como unico remedi pa scapa di un ley di Reino. E ley di Reino nos ta hay’e di tur manera awor, mas e ley di Reino pa e organo supervisor COHO. No ta descarta cu den e tempo nos dilanti nos ta haya algo parecido na e patraña orquesta pa dos parlamentario di e partido grandi den e coalicion na 2019, cu a kere cu bo por ‘delete’ Reino for di e ley, cambiando e texto den Word. E manera di opera ey por tabata mustra masha inteligente, pero lo tin como consecuencia na banda Hulandes cu nan por anticipa e tipo di accion aki. Asina anto nan lo no ta sorprendi pa e ultimo accionnan di gobierno di Aruba, cu ta hasta argumenta cu nan no por firma un protocol pasobra esey lo contra Constitucion di Aruba. Esey ta parce un bon argumento pero e no ta. Un simple pregunta: si bo tabata mester di aprobacion di antemano di parlamento pa bo firma un protocol cu Hulanda, bo a bay busca tal aprobacion? No, toch? Kico esey ta anto, pa continua e linea di argumentacion: bo no ta firma, pasobra bo no ‘mag’, pero bo no ta busca e aprobacion tampoco? Pasobra bo kier tranca e proceso? Y ta kico nos ta gana cu esey? Ta ken su interes ta sirbi aki? Ta bira tempo pa nos politiconan, tur si acaso nan no a comprende ainda: nos ta bao supervision financiero di Reino pa e proximo decada, y esey pa bon motibo. No ta un Hulanda neo-colonialista a haci un ‘mess’ den e lugar aki, sino nos gobernantenan local…