Agenda di Ehecucion: Nota di cambio di LMA mester ta cla December awor

Gobierno di Aruba tin den su poder e resultado di e investigacion cu Hulanda a haci riba condicionnan laboral primario, secundario y tercero, esta salario y beneficionan di tur trahado den sector publico y semi publico. E rapport aki awor mester resulta den adaptacion di e LMA, cu ta e ley cu ta regula condicionnan laboral di trahadonan publico, ademas cu ta bay tin consecuencia directo pa e forma con ta honra e pago di trahadonan publico.

Esaki a bira conoci na momento cu a publica e agenda di ehecucion cu Hulanda y Aruba a caba di firma. Den e agenda ta palabra e trabaonan cu mester tuma luga pa percura cu ta introduci e reformanan cu ta parti di e condicionnan cu Hulanda a pone pa Aruba a haya sosten di likides.

 

Aruba y Hulanda a completa cuadro di modelo pa presupuesto y cuenta anual nobo cu mester yuda na mehora e maneho financiero di Aruba, particularmente haya un bista pa asina duna Gobierno e control riba e fondonan. Esaki ta bisto for di e agenda di ehecucion cu Gobierno a caba di firma cu Hulanda na principio di October.

Mientras cu a caba cu e organisacion di e modelonan y procesonan pa presupuesto y cuenta anual, locual ta pendiente ta notanan di areglonan adicional pa maneho financiero, cu mester ta cla pa 15 di November, e concepto nobo pa destaho, e concepto pa cuadro di reportahe, y modelonan y procesonan pa presupuesto y cuenta anual mester ta formalisa na nivel administrativo.

E proyectonan concreto aki ta resultado di investigacion existente y/of adicional pa determina con ta fortifica e columna financiero di Aruba. Aki ta mira en todo cas na e control financiero y di maneho, tanto esun central (di gabinete) y cerca e servicionan, e funcion di auditoria, y e posicion di Raad van Advies y Algemene Rekenkamer. A base di proposicionnan lo yega na decision y implementacion. Pa logra e meta aki mester adapta e cuadro huridico, pa asina fortifica e columna financiero, pero tambe mester fortifica e organisacionnan financiero. Y pa esaki mester tin un reportahe di e investigacion cu ta tumando luga. E reportahe aki mester ta cla dia 31 di Januari 2022, cu mester ta continua cu un acuerdo na nivel di administracion unda ta comprometi cu ta sigui tur e recomendacionnan.

Pa November 1 proximo ta deseabel pa Gobierno mester tin e proceso di decision cla pa e institucion Comision Nacional di Sistema Estadistica. Pa logra esaki mester a investiga con por fortifica e proceso di decision a base di data y estadistica confiabel.

Maneho di subsidio

E siman aki lo inicia un investigacion riba e maneho y implementacion di subsidio. E investigacion ta termina Januari 1, 2022 y ta un trabao conhunto di Hulanda y Aruba. E investigacion lo determina si e maneho di subsidio, su implementacion y relacionnan di subsidio actual ta cumpli cu e exigencianan di legalidad, legitimidad, efectividad y eficiencia. E investigacion lo determina adaptacion di maneho, y lo cobra bek e subsidionan cu a keda otorga den forma ilegal, teniendo cuenta cu a cuadronan legal y principionan di ley.

Finalmente lo fortifica e compra di servicio y producto pa asina mehora eficiencia y efectividad, unda lo evalua centralisacion di e compranan aki. Hulanda y Aruba ta responsabel pa e investigacion. E trayecto aki ta tuma mas tempo pa motibo di reunionnan cu e proveedor riba e acercamento optimal pa e proceso aki.

Costo y efectividad sector publico

E palabracion entre Hulanda y Aruba ta cu mester hisa efectividad di sector publico door di baha e gasto di salario publico na nivel di e promedio Caribense cu ta 10 porciento di e Producto Interno Nacional y baha gasto di e sector publico en general. Alabes mester mehora calidad y efectividad, cu ta inclui poder di ehecucion di sector publico.

Tin actividadnan continuo pa percura cu Aruba ta sigura cu procesonan vital ta keda ofrece, manera electricidad, combustible, servicio di internet y data, awa, aviacion, servicio maritimo, trafico di pago, servicionan di asistencia y nan comunicacion, ademas di institucionnan medico

Companianan publico

Dia 15 di October proximo lo habri un destaho pa haci un revision di tur compania publico y semi publico y entidadnan di Gobierno. Segun e agenda di ehecucion, ta a base di e revision integral den e instancianan aki lo por determina e legitimidad di e accionnan publico, esta si nan ta sirbi interes y metanan publico, si nan ta eficiente y efectivo. E revision lo presenta sugerencia con pa hisa efectividad y eficiencia, cu mester keda implementa pa Aruba. E proceso di destaho mester ta cla pa 15 di Januari 2022

Aviacion

Pa loke ta aviacion, ta sigui e palabracionnan cu a haci den e grupo di guia Aviacion cu ta tarea di Hulanda y Aruba. E grupo Aviacion ta produci e datonan pa e paso aki. Te ainda no tin palabracionnan separa riba e tema aki den e agenda di ehecucion. Basa riba investigacion existente of nobo, lo traha hunto den cuadro di Reino pa fortifica e sistema di aviacion. Aki lo por trata un colaboracion mas estrecho cu organisacionnan y aplica procesonan di trabao uniforme conforme e exigencianan di siguridad internacional, unda e enfoke ta riba eficiencia y reduccion di costo.

Sosten legislativo

Pa 15 di December proximo, Hulanda lo inicia e exploracion riba creacion di un grupo legislativo pa duna sosten (temporario) pa fortifica e funcion legislativo di Aruba. Lo desaroya y implementa proposicionnan pa mehora y hisa calidad, efectividad y ehecucion di e organisacion publico. Bao di esaki tambe ta inclui e habilidad y efectividad di e conseheronan di Ministernan. E proyecto ta den fase di ehecucion y e forma con ta bay ehecuta ta basa riba busca y implementa posibilidadnan di solucion. Segun e agenda di ehecucion, ta pasonan cu ta facilmente por keda realisa y cu por keda implementa mesora.

Locual Hulanda y Aruba mester haci pa e siman aki, October 15, ta desaroya proposicionnan pa mehora e calidad, efectividad y poder ehecutivo di e organisacion gubernamental. E trabao preparatorio na nivel di ambtenaar ta cla, pa asina por sigui un sesion administrativo pa organisacion publico.

LMA

Kizas locual ta keda mas yamativo di e agenda di ehecucion cu ta sigui cu e proceso pa cambia e Landsverordening Materieel Ambtenarenrecht, LMA. Dia 15 di December lo mester presenta e nota di inicio pa e adaptacion di LMA y otro articulonan cu tin di haber cu rendimento y salida. Hulanda, hunto cu Aruba lo studia e cuadro huridico. E meta ta pa den cuadro di un esfuerso optimal di personal, lo investiga e formacion, ocupacion y presencia real y empleabilidad di trahadonan di Gobierno y organisacionnan publico. Si trahadonan ta ricibi salario di forma inapropia, depende di e situacion, lo tuma medida, manera para salario y cuminza un trayecto di retiro.

E rapport investigativo cu Hulanda a haci ta encera comparacion di e condicionnan laboral y ta recomenda unda por introduci recortenan den por ehempel pago di overtime, areglo di vakantie, recompensacion special, asina yama toeslagen, biahe y compensacion pa biahe.

Pa loke ta e uso di labor temporario, Hulanda y Aruba lo traha riba un plan, desaroya pa reduci y maneha gastonan riba e tema aki. Lo determina e pasonan cu mester sigui despues cu haci un inventarisacion e kwartaal aki.

Recurso Humano

Basa riba un revision riba e funcion di Recurso Humano, cu ta encera maneho, conseho di Recurso Humano, administracion y instrumentonan, lo por desaroya y implementa proposicionnan pa mehoracion. Hulanda y Aruba lo ehecuta e investigacion na e funcion di Recurso Humano y e grupo di trabao ta encarga pa determina e rapport, cu mester ta cla pa 15 di Februari.

Pa ta e rapport riba nivel administrativo esaki mester ta cla pa 15 di Maart y e continuacion ta determina a base di e recomendacionnan cu ta sali di e rapportnan aki.

E meta ta pa yega na un maneho di personal strategico, y pa esey mester tin investigacion. Nan ta inclui un planificacion strategico di persona, cu ta basa riba e revisionnan di e aparato publico y introduccion di un sistema di maneho di prestacion den e aparato publico. Crucial ta e limitacion di influencia politico riba asuntonan di personal.

Articulo ta continua riba pagina 7.