“Como minister encarga cu Asunto Economico, awe mi tin e honor y e placer pa informa pueblo di Aruba cu e autoridad pa competencia husto pa Aruba su economia, e asina-yama Aruba Fair Trade Authority a bira un realidad”, minister Geoffrey Wever a comenta ayera mainta durante un conferencia di prensa pa anuncia e desaroyo aki, cual ta sumamente importante pa nos pais.

Minister Wever a indica cu, igual na tur experto cu a yuda den e proceso, e ta convenci cu Aruba Fair Trade Authority (AFTA) lo trece cambionan importante y structural pa nos economia, comerciante, y tur ciudadano.

AFTA ta un entidad huridico independiente, basa riba ley. Su tarea principal ta pa crea nivel di competencia husto, liber y sin restriccion pa tur compania na Aruba, stimulando asina inversion di comercio den su generalidad. AFTA ta contribui pa prijs mas barata pa producto y servicio, mas escogencia pa producto y servicio, y miho producto y servicio pa nos consumidornan. Mayoria di pais desaroya rond di mundo ya tin un organo manera AFTA, cu ta evita cu tin abuso di e consumidor. Awo ciudadanonan di Aruba tambe por ta orguyoso y contento cu Aruba tambe tin su autoridad di competencia husto cu AFTA, segun Wever. Den noticia internacional, por observa regularmente con autoridadnan di competencia ta regula companianan na fabor di consumidornan. Por pensa por ehemplo riba e autoridad di competencia di Irlanda, cu ta encarga cu maneho corecto y husto di companianan gigante di tecnologia manera Google y Apple na Europa, preveniendo monopolio y comportamentonan anti-competencia.

Como minister di Asunto Economico, Wever a indica cu e ta bay ta e persona encarga cu e maneho di AFTA, pero AFTA ta un organo independiente basa riba ley, y cu ta encarga cu implementacion y supervision di e ley di e autoridad di competencia husto.

“Nos tur sa cu Pais Aruba ta pasando den momentonan financiero dificil”, Wever a bisa, “pero toch gobierno di Aruba a mira e importancia di AFTA y a dicidi pa aloca e fondonan pa haci esaki un realidad.”

Alabes el a destaca “e rol importante cu Hulanda a fungi den e proceso aki”, ya cu Hulanda a aproba e proyecto y segun Wever, a aloca fondonan – Afl. 620mil – pa implementacion di AFTA, y a pone na disposicion di Aruba un experto riba tereno di competencia husto, Sr. Albert Scholten. Scholten ta bay ta encarga di implementacion di AFTA, y guia profesionalnan local pa set up AFTA.

Sr. Scholten tin amplio experiencia den e ramo di competencia husto tanto na Hulanda como Corsou, “y mi ta kere cu nos tin suerte cu nos por conta cu e apoyo y sosten profesional di Sr. Scholten”, Wever a bisa.

El a comenta cu desde 2019, Departamento di Asunto Economico a bay Hulanda pa bishita e autoridad di competencia husto pa evalua si introduccion di un ley similar na Aruba lo tin beneficio pa nos economia. E resultado di esaki a mustra cu e ley di competencia husto lo tin beneficio pa nos economia, lo promove inversion door di crea competencia husto, liber y sin limitacion pa tur empresa local. “Pues despues di un trayecto largo tambe e ley aki a keda aproba den Parlamento di Aruba”, Wever a agrega.

“Recientemente den cuadro di e reformanan economico cu ta parti di e landspakket, Aruba a logra cu pa 2021 e proyecto aki a haya prioridad, cu a logra pa acelera implementacion di AFTA.”

Wever a introduci e team cu ta bay lidera AFTA, Sr. Albert Scholten, Sra. Amanda Maduro, y Sra. Carondina Leijdekkers.

Sr. Scholten di su banda a duna un presentacion amplio y detaya riba AFTA. Señor Scholte ta subraya cu AFTA tin gran beneficio pa e consumidor, negoshinan y economia, y cu economianan chikito y habri ta beneficia di un organo manera AFTA. Señor Scholten ta splica cu mas di 125 pais tin un autoridad di competencia y e efectonan ta positivo pa e economia di e pais.

Contestando pregunta di prensa, Sr. Scholten a indica cu ta spera cu AFTA ta bay ta operacional pa fin di 2023. Bon Dia Aruba a puntra si, a pesar di esaki, por indica si tin algun sector cu por premira tin mas urgencia pa haya atencion di AFTA. Sra. Maria Dijkhoff-Pita, director di DEACI, a contesta: Pa AFTA por cuminsa haci investigacion, e mester ta operacional, y esey lo ta pa fin di 2023. Pues mientras tanto, ta bay informa, educa y conscientisa e consumidor y empresanan di e reglanan.” Sinembargo, el a agrega cu na momento cu AFTA ta operacional, lo por duna cierto sectornan prioridad. “Pa esaki, AFTA lo haci investigacion y wak unda e necesidad ta mas grandi.”

Den nos siguiente edicion, Bon Dia Aruba ta bay elabora mas riba e contenido di esaki y con AFTA ta bay ta hinca den otro.