Despues di e anuncio di Promer Ministro di Aruba cu efectivamente ta trata di un conseho di CAft pa duna Gobierno di Aruba un ‘aanwijzing’, ta importante conoce e ruta cu lo sigui segun ley. Pero na promer lugar, kico ta un ‘aanwijzing’?

Segun e propio ley cu ta vigente den e caso aki (LAft, articulo 12 inciso 2), un notificacion di CAft por bay acompaña pa un conseho, debidamente motiva, pa duna “instruccion na Conseho di Ministro (di Aruba) pa cambia e presupuesto, o e ley di cambio di un presupuesto, di tal manera cu esaki ta cumpli cu e normanan, indica den articulo 14”. Es decir, cu e instruccion no por ser duna sin mas, sino cu e mester tin relacion cu cumplimento di e normanan stipula den articulo 14.

Esakinan ta, den forma resumi:

Cu CAft mester evalua presupuesto y e datonan di ehecucion di e ministerionan y di e demas partinan di e ‘sector colectivo’: e entidadnan publico o semi-publico acorda di ta forma parti di e sector colectivo. Den e ley mes tabatin norma pa deficit o surplus pa 2015 te 2018, y despues a establece norma segun e Protocol di 2018. E presupuesto y presupuesto multi-anual ta contene tur entrada y gasto, tambe e riesgonan di e financiamentonan fuera di presupuesto. E entrada y gastonan mester ta suficientemente splica y nan mester tuma lugar den e aña cu a haci e compromiso, a menos cu esaki obviamente bo ta sensato pa haci asina. Tambe e presupuesto mester ta modela di tal manera cu ta cumpli cu criterio di orden y controlabilidad. Tambe mester duna un relato di e situacion financiero di e sector colectivo.

E proceso, despues cu CAft a yega na e conclusion cu un aanwijzing ta na su lugar, segun e ley Arubano di supervision financiero (Laft, articulo 12, inciso 3), ta cu hunto cu e conseho di CAft na Conseho di Ministro di Reino, ta manda un copia pa e ministro responsable, den e caso aki e ministro di Finanzas di Aruba. Riba esaki e ministro por dicidi, di acuerdo cu e sentimento di Conseho di Ministro di Aruba, si implementacion di e presupuesto (2022), o un parti di esaki, ta keda suspendi. Esey naturalmente lo depende di e contenido di e conseho di CAft, pa loke ta e parti o henter e presupuesto cu lo considera suspende. Esey na e momento aki no ta conoci, ya cu Gobierno di Reino lo mester tuma un decision ainda riba e conseho di CAft, y por lo tanto esaki awor aki ainda ta conoci solamente pa Gobierno di Reino y Gobierno di Aruba.

Tambe simultaneamente CAft ta informa Staten di Aruba cu e conseho a ser manda pa Gobierno di Reino. Durante cu e implementacion di e presupuesto ta keda suspendi parcial o enteramente, e presupuesto, o e parti corespondiente di e presupuesto di e aña presupuestario anterior lo ta vigente. Ministro di Finanzas mester presenta e presupuesto di e aña anterior di inmediato na CAft pa nan evaluacion.

Segun articulo 12, inciso 4, durante e periodo den cual implementacion di e presupuesto ta parcial o enteramente suspendi, e presupuesto di e aña anterior ta parcial o enteramente vigente. Aki articulo 11, y tambe inciso 1 te 3 (di 12) ta aplicable mas tanto posible riba e presupuesto anterior. Esaki ta significa cu e proceso cu a cana pa evalua y eventualmente yega na un instruccion den caso di e presupuesto 2022, ta conta tambe pa e presupuesto anterior.

Na ki momento lo tin un aanwijzing?

Si Conseho di Ministro di Reino ta haya cu e conseho di CAft ta requeri un instruccion pa cambia presupuesto o ley pa cambio di ley di presupuesto di tal manera cu e presupuesto ta cuadra cu e normanan di articulo 14, anto por dicidi esaki. Promer cu ta entrega tal proposicion, ta duna conseho di ministro di Aruba oportunidad pa duna nan vision.

Kico ta sigui, despues cu Conseho di Ministro di Reino tuma tal decision pa duna instruccion? Gobierno di Aruba tin e oportunidad pa pidi conseho di Raad van State encuanto e disputa cu a surgi. Sin embargo, e peticion aki no ta suspende e Decreto Real (Koninklijk Besluit) den cual a duna e instruccion. Evaluacion di e asunto pa Raad van State por tuma hopi tempo y finalmente ta trata di un conseho cu e organo consultivo aki lo duna na Gobierno di Reino. No a yega den e ultimo añanan na un areglo di disputa, sosteni pa tur pais den Reino. Por lo tanto tin e areglo existente, cu ta duna Conseho di Ministro di Reino e oportunidad pa pone conseho di Raad van State un banda, aunke lo mester motiva esey debidamente.