Aruba ta haya 4 siman mas… Pa haci kico…?

Mientras cu hopi tabata spera, o anticipa, cu lo tabatin medida severo pa cu e accion di gobierno y parlamento di Aruba den e asunto di e cambio di ley di supervision, cu no ta di agrado di gobierno Hulandes, Aruba a logra atrobe un postergacion di decision den Conseho di ministro di Reino. Dia 18 di october si ta spera di por yega na decision definitivo.

Ta parce cu esaki a ser logra pa gobierno di Aruba mediante e carta di 17 di september, unda ta anuncia cu, despues di pensa esaki bon, a dicidi cu e proyecto di ley aproba na juni den parlamento, cu ta contene e cambio cu a causa e malestar na banda Hulandes, no lo ser manda pa Gobernador firma pa asina esaki bira ley. Awor gobierno di Aruba tin te 18 di october pa bin cu un solucion satisfactorio pa e acuerdonan concretisa den e protocol di november 2018 cu mester ta ancra den ley. Aruba por dicidi kico nan ta propone, basta e keda haci…

Pero, kico realmente ta e alternativanan pa regla esaki satisfactoriamente? Keda ancra den ley no por ta nada otro cu un proyecto di ley cu ta cana e caminda cu tur ley mester cana. Kico por haci anto? Un manera ta cu ta bin un proyecto di ley nobo, cu ta contene solamente e acuerdonan di e protocol di 2018, lagando un banda e amienda tan cuestiona cu e fraccion di e partido den coalicion mas grandi a formula. Berdad nos por bay presencia esaki, cu despues di tur e palabranan beligerante contra Hulanda, e fraccion ta bay baha cabes y ta laga e proyecto aki, cu tanto e presidente di Staten y e lider di fraccion a traha asina duro ariba, cay completamente, pa pasa un cambio di ley manera acorda den e protocol? Si esey ta berdad, anto e lo ta e reconocimento di cu henter e ensayo aki tabata uno inutil. Y nan no por bisa cu nan no a haya suficiente advertencia pa e ‘callejon sin salida’ cu nan ta aden actualmente. Si nan no kier reconoce esaki, ta obvio cu gobierno si a haya su mes den e situacion cu nan mester a reconoce esaki. E carta manda pa Staten ta papia pa su mes, unda gobierno ta bisa bon cla cu e “cambionan introduci sin embargo ta encera un desviacion imposible di ignora, di e acuerdonan di e Protocol.”

Despues ta bin un parti den e carta cu nos no ta comprende asina bon: “Den Conseho di Ministro di Reino como tambe den consultanan separa cu Hulanda, a mustra cu Hulanda pa motibo di e circunstancianan cu a surgi, lo termina su envolvimento den e supervision presupuestario na Aruba. Den un caso asina ta existi e posibilidad no ignorable di consecuencia negativo entre otro pa credibilidad financiero di Aruba.” Motibo pa urgi Staten, al menos e parti cu ta apoya gobierno di coalicion, pa mustra comprension pa gobierno den nan confrontacion cu Hulanda. E promesa cu ta trahando duro caba riba preparacion pa un Camara Presupuestario (Begrotingskamer) segun e normanan di Institucion Financiero Independiente di OECD ta zona bunita, pero ta keda algo cu no ta depende solamente di e bon voluntad di gobierno y parlamento mes, sino atrobe, y ainda, di esun cu pa Statuut tin e obligacion di eherce supervision semper: gobierno di Reino. Ta pesey tambe cu ta facil pa tira e pensamento den laira cu Hulanda “ta bay kita su man for di supervision di presupuesto” y cu esey ta bay tin consecuencia pa credibilidad financiero di Aruba. Ta berdad cu e agencianan di rating y IMF ta duna hopi peso na e papel supervisor di Hulanda, pero esey no ta un tarea cu Hulanda por simplemente pone un banda; nan mester actua obligatoriamente. Ta p’esey cu e idea cu no ta existi supervision Hulandes na cierto momento ta algo teorico, den practica semper lo tin supervision.

Y si esey ta e realidad, pakico anto nos no ta cuminsa actua consecuentemente? Ta p’esey den e Editorial aki, di e momento cu e idea a surgi den e partido mas grandi den e coalicion, pa deshaci di supervision di Reino, a bin nos critica riba e pretension mal pensa aki. Y pa ta obhetivo cu nan, nos mester bisa, tampoco pa prome biaha, cu e ley local di supervision ey ta algo cu nunca mester tabat’ey, aki mester duna e politiconan aki razon. Pero mester critica nan si pa e hecho cu nan tabata trata di ignora e hecho cu como nivel inferior di gobernacion den Reino bo no por aboli supervision superior di e manera aki, sin pensa cu di otro manera lo bo haya supervision toch. Talvez cu awor nan ta mira e consecuencia di nan accion, cu momentaneamente a trece euforia den nan seno, pero cu despues a resulta di no tin ningun valor real, pasobra e mesun ministronan cu a aplaudi e iniciativa dudoso aki, awor a haya nan den e situacion di manda bisa nan cu nan ta deposita e ley aproba den kashi. Kico a gana cu tur esaki? A haya 4 siman mas. Pa haci kico? Pa reconoce finalmente cu supervision ta inevitable?