Unabes cu Prome Minister di Aruba, Evelyn Wever-Croes a firma e acuerdo cu Hulanda cu ta inclui e dos rijkswet relaciona cu e entidad nobo, esta Entidad di Reforma y Recuperacion (COHO), y tambe e supervision financiero for di Rijkswet Arubaans Finanncieel Toezicht (RAFT), e prome cos cu ta bay pasa ta cu inicialmente nos pais ta haya un prestamo, ya den nos ultimo rosea financiero.

E prome mandatario a informa cu entre ayera y awe ta drenta e suma di 209 miyon florin. E ta un fiansa na cero porciento di interes cu pais Aruba tin cu paga bek na 2022.

Tambe e leynan di Reino tocante COHO y CAFT ta bay caminda pa e respectivo organo consultativo di Reino y di pais Aruba, esta Raad van Staten y Raad van Advies, pa e instancianan aki duna nan conseho. Unabes cu nan ta bin cla cu nan conseho, esaki nan lo wordo manda pa gobierno pa tene cuenta cu e cambionan, y despues nan ta wordo manda pa Parlamento.

Un aspecto cu e ta haya cu a cambia drasticamente den full e proceso aki cu aworaki si pais Aruba ta acepta, ta cu na september por ehempel no tabata cla ainda cu e tema di e COHO Y RAFT, y no tabatin sosten di comunidad. Adicionalmente Hulanda a cambia y baha e suma cu nos pais tabatin mester pa atende su gastonan te fin di aña. Premier a bisa cu loke a cambia riba e tema di entidad ta cu nan ta sinti cu Hulanda no ta bay sinta den stoel di gobierno y Parlamento.

El a menciona cu tin un articulo nobo cu ta bin den e ley mes cu ta bisa cu e prioridad di landspakket ta wordo traha entre COHO y Minister President di e pais. Otro punto ta e comision di evaluacion cu na mita di caminda y dependiendo di e resultado di evaluacion, bo lo por maneha y guia pa dilanti.

Tambe COHO no ta haya mas autoridad cu ta concerni y cu ta pertenece na gobierno y Parlamento. “E articulo nobo pa nos e ta garantisa e autonomia di e pais y e ta ilustra e spiritu di e areglo di cooperacion y acuerdo cu Hulanda.” El a considera esaki a punto principal cu unabes a drenta aden, nan ta haya cu nos por acepta e acuerdo aki ya cu na fin dia Aruba no tabatin mas opcion.

E prome mandatario a bisa cu nan lo cuminsa cu e implementacion di e acuerdo di biaha pa loke ta e Master Plan y e Landspakket, ya cu riba landspakket no tabatin “mucho discusion” y nan lo cuminsa aworaki cu e implementacion di e reforma necesario. Ya caba el a laga sa cu lo cuminsa traha riba algun condicion adicional riba mesa caba pa e siguiente tranche di januari, februari y maart di 2021.

Algun di e condicionnan nobo ta concerni riba estado di derecho, kiermen husticia. Tambe e tin di haber cu sector financiero y control nan cu mester bini. Tin otro condicion cu pais Aruba mester cumpli prome cu dia 15 di december riba areglo di pension di minister y parlamentario

Otro aspecto tin di hacie cu e Wever-Croes Norm cu ta pone un maximo pa salario di directornan ta bira un realidad prome cu e siguiente tranche. Hulanda kier pa gobierno di Aruba hancra den nos ley e parti cu empleado publico y esunnan cu ta traha pa fundacion subsidia pa gobierno cu a entrega 12.6% y e directornan 20% na aña 2020. Apesar cu gobierno kier mantene esaki como un palabracion di solidarismo, Hulanda kier pa e entrega aki por continua y formalisa den un ley cu ya caba ta andando, prome cu nos ta yega na e siguiente tranche.