Nos ta den porta di eleccion y diferente candidatonan ta haciendo nan best pa haya voto pa asina nan partido por goberna nos pais pa e siguiente periodo. Normalmente un partido politico supuestamente mester tin un ideologia cu ta locual ta mantene e direccion y pensamento di e partido hunto.
Lamentablemente masha poco partido na Aruba tin un ideologia. Hopi di nan a core forma pasobra nan kier participa den eleccion y ta busca un manera pa haya asiento y hasta purba haya e oportunidad pa goberna nos pais. Partido MEP a laga su ideologia Social Democrata cay di hopi tempo caba ora cu nan a demostra durante nan gobernacion di 2001 pa 2009 cu nan tey pa enrikese nan mes y famia. Awor MEP ta un partido cu ta haya voto danki na Sr. Betico Croes q.e.p.d. Pero di e ideologia cu e lider a lanta partido cu ne, no a keda nada.
Poco candidato cu ta riba e lista geel a demostra di tin conocimento pa goberna y esunnan cu ta den Parlamento actualmente masha poco ta presenta na trabou y no ta ni altanto di kico ta pasando riba nos isla pasobra semper nan a mantene nan mes leu di realidad. Solamente expresionnan negativo nos por a tende di nan y nada funda. Partido POR a wordo forma pa un ex-minister cu a forma parti di gobernacion actual pa 7 aña largo y awor ta critica gobierno comosifuera e no tabata tin ni arte ni parti den dje. Su persona y e candidatonan ta persona cu ta riba lista pa motibonan personan y ta en busca di logronan pa nan mes.
Awor e partido ey ta critica cu placa di ATA y TPEF a wordo inverti den parti di nos infrastructura mientras cu ta e lider di e partido ey mes, hunto cu gobierno y cu aprobacion di parlamento, a realisa e projectonan aki. Nan ta papia di independisa Parlamento mientras cu e ex-minister ey mes tabata rabia y zundra ora nos cambia su leynan y of reclame cu ela huur edificio di su famia como minister. Hasta un di e candidatonan, cu a pasa den tur partido caba pa drecha su posicion personal, ta criticando e tram den caya grandi lubidando cu e mes tabata PRO e projecto. Di otro banda nos tin partido AVP cu tin su ideolologia Cristian Democrata cu ta mantene tur e candidatonan hunto den un pensamento cu ta pa traha na bienestar di nos pueblo. E gobierno actual ta riba un nivel mas halto cu nunca cu te hasta United Nacion ta trahando cu nos. Ora bo ta traha cu UN nan ta exihi transparencia total pa asina e trabounan por wordo haci.
Actualmente UN ta bezig cu Aruba riba e 17 areanan di sostenibilidad cu ta bay ta e base pa soluciona tur problema cu nos y otra paisnan por tin pa asina enfrenta nan futuro riba un manera sostenibel. Ningun di e otro partido politiconan a mustra interes pa participa. “Aruba ta e pais mas autonomo den Reino Hulandes, mas cu Hulanda mes cu mester sigui locual cu Union Europeo ta determina pa nan”. Hulanda tin gara riba tur nos hermana islanan incluso Corsow y Sint Maarten. E dos ultimonan ta pasobra nan politica ta carece di partido politiconan cu tin un ideologia.
“Cada biaha cu nan forma un coalicion pa goberna, e gobierno ta cay pasobra cada parlamentario y minister tin nan mesun pensamento personan”, Rasmijn ta bisa. E hermana islanan no tin stabilidad politico y esaki ta haci cu ta dificil pa nan por wordo goberna na un manera responsabel. “Imagina Aruba cu un coalicion MEP y POR unda cu interes personal lo prevalece y POR lo pone presion riba MEP pa saca mas probecho personal cu nan por”.
Un gobierno asina aki, mescos cu Corsow y Sint Maarten ta experencia, no por funciona y logicamente Hulanda lo cay aden y cuminsa goberna nos pais tambe mescos cu ta e caso na Corsow y Sint Maarten. “Aruba ta gosa di un gobierno stabiel y esaki ta danki na e Gabinete Eman I cu II, nos peublo sa esaki y lo keda sostene partido AVP”, Rasmijn ta termina.
