Awendia uzo di un simpel smart phone a bira un instrumento clave pa capta turistanan potencial y yuda nan eligi e destino cu nan lo kier bay. Alejandro Rico kende ta representante di Google pa e Centro America y Caribe a declara na Bon Dia Aruba cu si e companianan y marcanan no ta disponibel den smart phone, nan ta perde e mercado ey.

“E no ta algo cu ta bin den futuro, sino cu e ta un realidad cu ta tumando luga caba y cu mester ta prepara pa cuminsa cu esaki.” Pa loke ta Aruba, e ta haya cu nos ta un di e destino turistico den Caribe cu mas fuerte ta bin trahando riba e tereno aki, y nos ta bayendo riba un bon caminda.

Sr. Rico a bisa cu un aparato asina ta importante particularmente pa e mercado di Latino America y Caribe. Pa loke ta e marca of ‘brand’ Aruba, sr. Rico ta haya cu nos pais ta bin realisando un bon trabou pa consolida su nomber den e plataforma aki. Nan ta trahando hopi di cerca cu ATA. “Nos ta wak avancenan grandi y nos ta wak cu nan tin hopi contenido cu ya caba ta disponibel pa aparato movil.”

E ta haya cu esaki ta un step importante pa e marca Aruba ya cu esaki ta permiti cu e experiencia di Aruba sea bastante agradabel pa e usuarionan. Nan a identifica cu mas usuarionan ta yega na internet pa medio di smart phone. Tambe algun indice ta mustra cu un 60% di e usuarionan ta haci nan buskeda y consulta di video pa biaha algun destinacion via nan smart phone.

Fortalecemento

Sr. Rico a duna un presentacion riba e topico aki den e prome evento di Latin America Planning Meeting di Aruba (LAPMA) organisa pa Aruba Tourism Authority (ATA). Igualmente directora di ATA, Ronella Tjin Asjoe-Croes, a declara dilanti cu e presencia un selectivo grupo di invitadonan di Aruba su socionan principal, e VIP companianan di cada mercado den e region Latino Americano, cu regularmente nan ta participa activamente den e diferente feria di negoshi di nos region. Tambe den conhunto cu diferente hotel miembronan di AHATA nan ta organisa caravana turistico y bishita na operadonan turistico, agencia di biahe y companianan aereo di e diferente pais.

Otro obhetivo secundario ta esun di stimula den e periodo di necesidad un demanda pa bin Aruba di e profile di e turistanan desea pa bin nos isla. Esaki lo sigui ta un di e principal area di enfoke di ATA. Mas tanto nan ta e lunanan di mei, juni, september, october y november. E delaster lustro a mustra un aumento constante di bishitante durante e lunanan ey danki na e contribucion di tur mercado cu Aruba tin incluyendo e region di Latino America.

ATA lo continua fortalece su relacion cu companianan aereo como un di nan prioridadnan clave. E capacidad total di stoel pa Aruba den tur mercado – cu excepcion di e region di Caribe cu nan ta considera mas local y Venezuela – a aumenta cu 7% aña pasa den comparacion cu 2016. Esaki a inclui un 4% di crecemento di stoel for di Latino America sin inclui Venezuela.

Avianca y Copa ta sigui como e dos compania cu ta prevalece riba otronan for di Latino America cu vuelonan diario y bon conexionnan for di e diferente mercado. E compania LATAM tambe ta dunando un gran contribucion cu dos vuelo pa siman. ATA ta explorando posibilidad nobo pa logra miho conexion for di parti sur di Latino America pa logra e yegada di mas bishitantenan di e paisnan ey.