Den su maneho Minister di Husticia, Andin Bikker kier pa nos cuadro huridico of leynan ta ‘dilanti di biento,’ pa atende cu caso di terorismo.
E punto di lansa di e mandatario aki ta pa actualisa y modernisa nos leynan anticua mas rapido cu ta posibel, ya cu ainda nos tin leynan cu ta data di 1889 y cu no a wordo mishi cu ne, segun e minister en cuestion. Un realidad cu no ta klop den un mundo cibernetico y avansa.
Ya caba nan ta bezig cu diferente ley penal cu lo wordo adapta; pero tambe esun di terorismo cu ta un fenomeno cu ta tumando luga y cu ta wordo atendi y combati internacionalmente. E intencion tras di e fortalecemento di e ley aki ta pa ‘duna un señal fuerte como legislado cu cualkier persona cu ta hinca algo den su cabes cu nos ta prepara pa castig’e severamente,” el a bisa.
P’esey den cuadro di su bishita cu siman pasa Minister Bikker a realisa na Merca, el a atende cu diferente departamento cu tin di haber cu husticia, entre nan DEA, caminda el a por sinti cu ta existi hopi aprecio y conocemento di nos isla cerca e autoridad Mericano. El a bisa cu Aruba tin diferente acuerdo cu Merca y un di nan tin di haci cu combatimento di criminalidad.
Un tema trata cu autoridad Mericano tin di haci cu siguridad cibernetico, considerando cu tur hende practicamente ta online constantemente cu nan aparato digital. E mandatario a bisa cu mirando e trayecto aki el a bin cu un institucion cu tin como tarea brinda e siguridad online.
Tambe nan ta trahado pa duna contenido na un tratado cu Aruba tin cu Merca, mirando cu nan tin hopi experticio ariba combatimento di crimen online. Otro asunto tin di haber cu e tipo di circulacion monetario digital manera Bitcoin. E tipo di monedanan digital aki ta un sistema tambe uza pa e crimen organisa y hendenan pa sconde e origen di nan placa.
Den cuadro di esaki -segun Minister Bikker- Merca ta dispuesto pa duna diferente tipo di asistencia entre nan training cu tambe nan ta duna na otro parti di Caribe. E mandatario kier duna mas contenido na e acuerdonan aki considerando cu Merca ta un di nos partner mas grandi y importante economicamente.
