Aruba no a mira un KB (Koninklijk Besluit), ni un aanwijzing di parti di Conseho di Minister di Reino ayera, manera cu tabata colgando riba cabes anteriormente. Gobierno a dicidi di no ratifica e ley cu Parlamento su amienda, cual a causa e problema na Den Haag, cu comprension di Parlamento. Prome Minister Evelyn Wever-Croes (MEP) a indica cu tur cos ta ‘back to normal’: E LAft bieu ta keda vigente, cu e protocol como extension di e ley.
E prome mandatario a expresa cu e tin comprension pa ambos banda di e medaya, tanto di banda di Parlamento, cual tin preocupacionnan cu e ley sin e cambionan cu a introduci lo no cuadra constitucionalmente, como di banda di RMR cu ta haya cu si nan perde control riba e situacion nan lo retira CAft. “Pero Aruba no por keda sin supervision,” e premier a indica.
Loke a dicidi, segun e prome mandatario, ta den cuadro di gobierno su autoridad, mirando cu esaki ta hinca den constitucion, cual ta bisa cu gobierno por dicidi di ratifica un ley of no. Pero no a laga esaki sin splicacion, mirando cu a informa Parlamento dicon a dicidi di no ratifica e ley aki. “Na final mi a pidi Parlamento su comprension, y mi a bisa nan cu si tin cualkier pregunta cu gusto mi lo bay duna informacion pa Parlamento riba esey”.
Pues e peticion di gobierno di Aruba a keda honra riba nivel di RMR, asina kitando e KB of aanwijzing di e agenda. E prome minister a splica cu e situacion aki a yega na mesa di RMR pasobra den e protocol tabatin specifica cu e ley di LAft no por pasa sin cu RMR duna su aprobacion. Na momento cu Parlamento a cambia e ley den juni, gobierno a cumpli cu su palabracion y a manda esaki pa gobierno di Reino. Inoficialmente Hulanda a duna reaccion fuerte y na momento ey a duna gobierno di Aruba un chens extra despues cu prome minister a bay delibera cu e conseho di minister di Reino.
Na e momento ey, segun prome minister, ainda tabata riba e agenda pa trata e problema aki, pero awo Aruba a baha di RMR su agenda completamente. Si tin cierto condicion, e mandatario a indica cu por lo menos ainda no tin algo asina riba mesa.
Prome cu e conferencia di prensa unda prome minister a duna e informacion aki, lider di fraccion di MEP den Parlamento Rocco Tjon a splica durante un conferencia di prensa cu nan a aprecia prome minister su splicacion y tambe cu a bay Parlamento pa splica e situacion, asina dunando respet na Parlamento como organo di control. Tjon a indica cu den e caso aki e interes general di Aruba a prevalece.
3 proyecto di ley pa yega na propio instituto di control
Pa por yega na Aruba su propio instituto di control financiero independiente, gobierno di Aruba ta implementando 3 diferente ley, di cual 2 caba ta bayendo Conseho Consultativo (Raad van Advies, RvA). Como prome ta bay pone cu gobierno mester tene su mes na finanzas duradero den constitucion, cual a sali ayera pa RvA. Banda di esaki e ley unda ta institui un camara presupuestario bou RvA mes tambe a bay pa e organo aki conseha riba dje, na caminda pa e por yega Parlamento.
E di 3 ley y esun ‘un poco mas complica’ segun Wever-Croes, ta un ley unda ta bay stipula ki normanan gobierno mester tene su mes na dje. “Pa esey si nos mester un poco mas tempo y nos ta calcula cu pa comienso di otro aña e por cuminsa cana su caminda pa yega Parlamento”. Unabes cu tur tres ta den nan luga, e begrotingskamer (camara presupuestario) lo ta un realidad.
