Ayera e reunionnan interparlamentario a continua na Den Haag. Un di e puntonan poni riba agenda tabata e tema di integridad. Esaki ta di dos dia cu e tema aki ta wordo trata. Partido MEP a presenta un nota cu MEP a presenta ya desde aña 2014 y a adapta na aña 2015.
Lider di MEP, Evelyn Wever-Croes ta elabora riba esaki: “Den e nota aki, mi a splica cu Aruba ta e unico pais cu ainda ta canando atras considerablemente riba e tema di integridad. Nos no tin un ley di financiamento pa partidonan politico. Consecuentemente tin placa ta drenta campaña politico specialmente den e partido na mando. Nos sa cu e hendenan cu ta financia gobierno no solamente ta hinca hopi placa sino nan ta pidi fabornan a cambio. Lamentablemente no tin un ley pa frena esaki. Nos no tin un ley drechi di “screening”. Aunke cu dos siman pasa un ley a wordo aproba den Parlamento, pero esey tabata mas bien pa acomoda e minister cu actualmente ta wordo sospecha di corupcion. Basicamente no por bisa cu esaki ta un ley di screening drechi sino un berguensa pa Aruba cu nos tin dicho ley.
Tampoco nos tin un codigo di conducta di minister y parlamentarionan cu ta instrui of dedica na elimina cualkier impresion y percepcion cu un minister of parlamentario ta wordo cumpra pa esnan di baho mundo. Den e codigo di conducta mester wordo inclui kico ta e sosten financiero cu e politiconan ta haya y con e placa aki ta wordo registra. Tambe si e politico tin otro trabou of otro entradanan. Aruba ainda no conoce e leynan aki. Tampoco nos tin leynan cu ta proteha ciudadanonan cu kier denuncia actonan di corupcion. Un ambtenaar cu tin prueba di corupcion di un minister, no por haci un denuncia pa motibo di miedo pa wordo persigui y perde nan trabou. Ta pa e motibo aki nos kier bin cu leynan manera e Klokken luidersregeling y Ombudsman pa duna proteccion na ciudadanonan cu kier bin dilanti cu kehonan of cu ta victima di corupcion of ladronicia. Ta di lamenta profundamente, cu tabatin un conferencia tocante Ombudsman di e islanan di Caribe na unda Aruba tabata ausente. Y ya a wordo demostra caba cu Aruba lo no cumpli cu e plaso di 1 di juli pa por tin un defensor di pueblo, un Ombudsman.
E gobierno na mando claramente no tin niun interes den e leynan aki. P’esey pa Partido MEP, ta di gran importancia cu nos a haya e oportunidad den constelacion di Reino den e reunion di IPKO pa trece e temanan aki padilanti. Y un bes mas, a keda prueba cu Aruba ta e isla cu ta cana mas atras den e demas paisnan di Reino. Specialmente cu awo cu nos ta pasando e berguensa grandi di e caso di un minister cu ta bou investigacion. Y esaki mester cuminsa pone e presion riba AVP pa nan cuminsa actua. Sint Maarten, Corsou y Hulanda si tin e asuntonan aki regla. Hunto nos a palabra cu nos lo sigui intercambia di opinion y traha riba e puntonan aki cu mi a menciona. E tema di robo di asiento ta bin acerca. Ora cu un parlamentario declara su mes independiente, tambe ta wordo considera pa paisnan den Reino como algo contra integridad. Medidanan mester wordo tuma riba esaki tambe”. Sra. Wever-
Croes ta termina bisando: “Ainda tin hopi trabou cu mester wordo haci. Sinembargo, mi ta contento cu e presion ta keda riba Partido AVP pa sigui traha riba e temanan aki. Mi no ta perde speransa cu pronto nos lo bay haya e leynan aki pa garantisa cu nos pais tambe ta bay haya gobernantenan integro. Si no logra prome cu cambio di gobernacion, despues di 22 di september cu MEP drenta den gobierno, nos lo percura pa tur e leynan aki wordo introduci y asina nos brinda e pueblo gobernantenan integro. Hendenan cu ta bisa loke nan ta haci y haci loke nan ta bisa”.
