E pandemia mundial Covid-19 a afecta Aruba severamente. Segun IMF a pronostica na comienso di e pandemia, Aruba lo tabata e pais mas afecta den nos region.
Awor, dos aña despues, Aruba a bira e pais number 2 den mundo pa cu e recuperacion di turismo, danki na e maneho firme di e pandemia door di CrisisTeam y Ministerio di Salubridad Publico durante pandemia, segun un comunicado di prome minister, Evelyn Wever-Croes. Danki na e maneho prudente cu a wordo hiba den pandemia y pa e decisionnan cu a wordo tuma, cu curashi y bon preparacion, awe nos ta mira e frutonan. E exito aki ta danki na tur esnan cu ta traha den e sector di turismo.
Asina ya caba na januari di e aña aki nos a anuncia e “exit strategy” den pleno pandemia.
Turistanan a demostra confiansa den Aruba y nos a mustra nan cu Aruba ta un destinacion safe pa bin bishita. Esaki ta danki na e esfuerso di cada ciudadano cu ta traha den e sector di turismo.
“Pa esaki mi ta gradici y felicita colega Minister Dangui Oduber, pa su vision, y su determinacion. Aruba ta den recuperacion, y un biaha mas Aruba ta un ehempel y un inspiracion pa mas pais. E desaroyo economico creciendo aki, lo crea mas cupo di empleado y mas oportunidad pa nos ciudadanonan. Mi ta hopi satisfecho y orguyoso cu e desaroyo aki. Aruba ta den recuperacion y nos lo no permiti nada frena e recuperacion,” Minister President Evelyn Wever-Croes a duna di conoce.
