Dia 28 di juli, Departamento di Finanzas a duna un presentacion riba e maneho financiero di Aruba na e secretariado di CAft. E presentacion a tuma luga den presencia di Centrale Accountantsdienst (CAD) hunto cu e Tijdelijke Werkorganisaties Aruba en Nederland (TWO) cu ta coordina e progreso di e reformanan den cuadro di e Landspakket.
Segun un comunicado di gobierno, e meta di e presentacion tabata pa informa CAFT di e trabaonan cu ta wordo haci pa na Aruba pa por mehora e maneho financiero di nos Pais. Durante e presentacion, CAft por a haya un bista di e ultimo desaroyonan y tambe a haya un bista mas detaya di e procesonan financiero cu lo wordo fortifica of reorganisa e tempo nos dilanti. Den cuadro di esaki por menciona cu ta trahando riba e implementacion di e modelo di ‘3-lines of defence,’ cu ta un sistema di control cu lo mehora e control interno den e columna financiero di Pais Aruba.
Minister di Finanzas, Xiomara Maduro ta gradici e ehecutivonan di Departamento di Finanzas, CAft, TWO Aruba y Hulanda, y tambe CAD pa e reunion frutifero aki na unda por a brinda un bista mas amplio riba e trabaonan necesario pa por mehora e maneho financiero di Aruba. “Nos Pais ta recuperando y na un manera activo y cu rienda den propio man, nos ta traha pa sigui desaroya nos Pais su finanzas publico,” tabata palabranan di Minister Maduro.
