Jossy Adriaan Brokke a nace na Aruba, dia 15 di juli 1947. Jossy su nombeman di cariño ta Papichi, Pichois, Papi y Jos. Tin algun mas, pero Jossy no ta bay hinca nan den su biografia, pasobra esaki lo cay fo’i otro.
E mayornan di Jossy tabata Jose Juliano Brokke y Maria Magdalena Brokke-de cuba y el a nace den e bario di Oranjestad. Temponan aki, su wela tabata biba na Nieuwstraat. Esaki ta e caya cu ta core paralelo cu Wilhelminastraat, unda andes tabatin e tienda Habibe.
Ademas di Jossy, su mayornan tabatin 6 ruman mas, haciendo un total di 2 ruman homber y 5 ruman muhe. Jossy tabata e yiu number 5 di e famia y eventualmente el a casa cu Sandra Lourdes Ponson.
Den e famia di Jossy tin mas musico. Por ehempel, su tata tabata un cantante di tango, y su mama nunca por a para keto ora cu e tabata na cas, cantando su cancionnan. Jossy tambe tin un ruman muhe ken ta un artista asina conoci cu e tin un nomber artistico Dhaddy Brokke, aunke su nomber di nacemento ta Nidia Veronica Brokke.
Un bida artistico pa Jossy tabata dune loke e ta gusta y stima. E tabata stima ta un artista. For di un edad hoben, ya caba Jossy tabata canta. Cu 9 aña el a canta fuera di e pais caba. E tempo aki, su tata tabata cahero principal di gobierno, y cada 6 aña tur ambtenaar di gobierno tabata haya un vakantie di 6 luna pa por biaha cu nan famia. Durante un di e vakantienan aki e famia a dicidi di bay Costa Rica. Banda di unda nan tabata kedando, tabatin un misa manera un catedral grandi unda tur diadomigno su tata tabata bay cu nan. Ora cu misa tabata caba, manera casi tur pais latino, un parke dilanti e misa tabata yena di musico y esaki ta unda Jossy a bay canta cu mariachi. E momento tabata asina fantastico cu su rumannan a bisa Jossy cu e tin cu sigui canta.
E cuatro tabata un instrumento cu Jossy tabata stima masha hopi. E music Milo Muyale a siña Jossy toca e instrumento pa asina nan por toca hunto, cu Milo tocando su harpa y Jossy cantando. Hunto, nan a logra bay varios luga rond di mundo, manera Las Vegas Nevada, Thunderbird Hotel na Las Vegas, cual e tempo aki tabata un di e hotelnan mas grandi. Nan tabatin grabacion tambe. Pa hopi tempo Jossy a toca cuatro, te ora cu el a bay Hulanda y a cuminsa riba Guitara.
For di e tempo cu Jossy a bolbe Aruba, el a cuminsa skirbi cantica. E prome cantica cu el a yega di skirbi a bira un hit mesora y tabata na Spaño, den e genero di Bosanova. E titulo tabata “No me dejes,” y Jossy a graba esaki hunto cu The Strangers di Savaneta.
Semper festivalnan di musica di nos mesun hendenan tabata impresiona Jossy. Esaki ta pa motibo cu e artistanan tabata logra cuminsa gana den e mundo aki, y sigur cu pueblo mirando nan esfuerso y con nan tabata gana trofeo cu tin balor den nan carera musical.
Aunke Jossy a bay laga nos, e ta laga atras un legado sin igual pa nos y nos futuro generacionnan mira y honra. Su sugerencia tabata pa tur artista train di bon manera y cu seriedad. Busca e genero di cancionnan cu ta bay cubo pasobra un cancion mester cuadra cu bo personalidad. Hopi biaha un persona ta canta un cantica cu no ta pega cu su personalidad, y den e caso aki ta bira dificil pa interpreta e cancion cu exito. Tur esaki ta cosnan cu Jossy a siña durante su biahenan, y ta enseñansa cu e ta laga cu nos.
Potretnan di pagina di Facebook di Jossy Brokke.
