For di mita di luna di december ultimo, nos ta gosando di un temperatura excepcional di frescura te hasta di un tiki di friu den oranan di anochi y siguramente den oranan madruga.

Sr. Bakmeyer di Meteo Aruba ta bisa cu te ainda nan no a registra un record relaciona cu registracion di  bahada di temperatura riba nos isla. Pero nos mester corda cu na luna di januari e temperatura  normal ta baha un  tiki, e ta splica. Pero adicionalmente ta sosode cu den e dianan aki nos tin un fenomeno di un frente friu cu ta bin for di e parti noord di Caribe. Esey nan ta ocasiona bientonan cu ta bini di direccion noordoost pa Aruba, caminda cu normal nan ta oost.

“Ora cu e ta bin di noordoost e ta trece friu di mes for di noord Esey a pone cu e temperatura ta baha un tiki mas den e dianan aki.”

Pa ehempel ayera mainta mes a wordo registra un temperatura di 23 grado Celsius cu ta basta fresco . Den oranan laat di anochi tambe e biento ta trece e fresco locual ta haci cu e temperatura ta facilmente te yega entre 25 pa 26 grado Celsius . E ta un diferencia grandi considerando nos temperatura tropical normal di un isla Caribense, unda den  epoca di calor nos ta confronta temperatura di 30 grado Celsius den oranan di anochi.

Aruba no ta un isla cu ta conoce e cuater stacion. Mientras cu den otro pais nan ta pasando den un winter pisa, nos isla no ta conoce winter. Pero hemisferio noord ta den winter aworaki loke ta haci cu e temperatura ta mas abou cu e normal.  Pues nos lo sigui disfruta di e temperatura fresco eventualmente henter januari.

La Niña
Actualmente nos tin condicionnan di e fenomeno conoci como La Niña.  Pero ainda ta dificil di pronostica si e condicionnan aki  ta bay dura hopi. E condicionnan aki a keda observa prome cu fin di aña y na cuminsamento di e aña aki, caminda nos ta keda haya awasero aunke no pisa.  “E ta un tiki molestioso. E awa ta cay y stop, esey a contribui na e caymento di awa”, segun sr. Bakmeyer.

E ta di spera cu den proximo dos luna e lo bay den un fase neutral. A menos cu e condicionnan di La Niña ta sigui persisti. Si e condicionnan cu no ta conociendo aworaki caminda awa ta cay y stop ta sigui persisti, e ora ey ta wordo declara formalmente e presencia di e fenomeno di La Niña. E fenomeno di La Niña ta conoci den Caribe cu presencia di bastante awasero mas cu averahe  normal.  Tambe mas leu den aña nos ta haya confronta cu actividad ciclonico abnormal.