ORANJESTAD – Recientemente e oficina di Turismo Aruba (A.T.A.) a ricibi e grato noticia cu e prestigioso y conocido user review y booking site TripAdvisor a nombra Aruba como e di tres isla mas gusta mundialmente pa cu destinacionnan Caribense.
A describi nos isla como un isla ehemplar den Caribe na unda den e relato riba e website a añadi cu: “Aruba ta e isla ehemplar den Caribe rondona cu solo, lama y playanan cu santo blanco. Tempo ta pasa poco poco na un manera dushi mientras cu bo ta disfruta di un cocktail tropical of cu bo ta encanta e bista bao lama na unda solamente e piscanan ‘parrotfish’ ta parce di tin pura. E colornan pastel di e edificionan den e capital Oranjestad ta puntonan di referencia y na un manera dibertido e tiendanan ta invita bo pa haci bo compras. Bo por disfruta di e sombra di mata riba Eagle Beach mientras cu e zonido di e olanan for di e awanan blauw ta parce di a wordo crea specialmente pa bo.”
Aki nos por mira cu aprecio y cuido di nos recursonan natural ta primordial no solamente pa e turistanan pa asina mantene nos isla den e top destinacionnan pero tambe pa nos mes y e futuro generacionnan.
Den e articulo, Aruba ta keda un destinacion popular y ta aparece despues di Jamaica y Puerto Rico entre e islanan mas busca riba e sitio web. Otro destinacionnan menciona tawata Barbados, Punta Cana Republica Dominicana, Grand Cayman Cayman Islands, St. Lucia, Providenciales Turks & Caicos, Guadeloupe y finalmente New Providence Island Bahamas.
London a wordo nombra como e destinacion cu e miho clasificacion di mundo den e nominacionnan anual di destinacion di ‘TripAdvisor’s Travellers’ Choice’.
E ganadonan a wordo determina utilisando varios algorithms cu ta analisa e miyones di comentario y clasificacionnan di hotel, restaurant y atraccionnan tur compila den un solo aña di tur e biaheronan cu ta haci uzo di TripAdvisor mundialmente.
E plataforma online tambe ta menciona cu ta bale la pena pa e bishitantenan explora mas cu solamente e famoso atraccionnan cu un destinacion ta ofrece, ya cu e biaheronan lo haya un experiencia autentico y memorabel cu ta diferencia su mes di e atraccionnan turistico.
Ademas di esaki, A.T.A. semper ta busca maneranan innovativo pa market nos destinacion den e mercadonan unda nos isla ta wordo representa.
E oferta di vuelo for di e ciudadnan mas grandi den tur mercado, principalmente esun Mericano pa nos destinacion tambe ta hunga un rol importante den esaki caminda e bishitantenan por yega Aruba facil y lihe. Banda di esey, A.T.A. ta promociona constantemente e atractivonan cu nos isla tin bao diferente segmento manera famia, honeymooners, y esunnan buscando aventura den naturalesa, entre otro.
A.T.A. ta felicita Aruba cu e logro aki y ta pidi un y tur pa sigui proteha nos recursonan natural, incluyendo nos calor humano, pa asina e sector turistico por sigui prospera y sostene nos
