Departamento di Salud su Servicio Veterinario ta bisa cu nan ta controla ‘tur’ carni cu ta drenta Aruba for di Brazil. Manera Bon Dia Aruba a publica un siman pasa, autoridadnan di e pais aki a descubri un fraude cu carni putri.
Nan ta remarca cu na Aruba mayoria carni ta procedente di Argentina y for di Merca, pero un parti tambe ta bin di Brazil.
“Mescos cu Nederlandse Voedsel- en Warenautoriteit di Hulanda, aki na Aruba tambe Servicio Veterinario tambe a activa mesora y ta aplica 100% control visibel riba tur carni di e pais Latino Americano” asina nan ta informa. E instancia tambe ta bisa cu nan ta ‘den contacto estrecho cu nan coleganan di Hulanda pa asina garantisa cu aki tambe ta aplica e mesun reglanan cu Hulanda y cu ta aplicando na paisnan miembro di Union Europeo’.
“E reglanan ta mas estricto pero ta pa garantisa cu solamente carni di calidad ta yega e paisnan aki.” “Pa evita cu ta crea panico innecesario, ta bon pa aclaria cu ta 4 compania ta wordo sospecha di e practica aki. Pues ta cuestion di verifica di unda e carni ta bin, di cua compania, di cua slachthuis y verifica e number di e carga.
Ora un di e informacionnan aki no ta cuadra, ta prohibi entrada di e carni na Aruba. Ya caba a prohibi un container cu ta den ruta pa nos isla, cu no lo permiti drenta mercado”, asina Departamento di Salud ta sigui splica.
