Den un comunicado di prensa, e embahador di Suecia na Hulanda, Annika Markovic, a anuncia e nombramento di sra. Yvonne H. M. Escalona como Consul Honorario di Suecia na Aruba, cuminsando di a 1 di januari 2019.
Sra. Escalona a nace na Aruba, tin nacionalidad Hulandes, y ta un contado colegiado conoci na Aruba. Actualmente, e ta managing director na e grupo di compania Visser, cu tin branch na Corsou y St. Maarten.
Desde 2014, sra. Escalona ta un miembro di e Board of Supervisory Directors di Banco Central di Aruba. Ademas, e ta presidente di e fundacion CasMarie, un centro di experticio pa personanan cu syndroom di demencia, y nan famia cu ta duna ciudo.
Sra. Escalona ta e sucesor di sr. Ceasar Giovanni (Joe) Maduro, kende tabata e Consul Honorario na Aruba desde 1996. Pa su servicionan, sr. Maduro a wordo premia cu e Orden Real di e Strea Polar, clase comandante, di e Rey di Suecia na 2009.
Embahador Annika Markovic ta desea sra. Escalona tur clase di exito de su cargo como Consul Honorario di Suecia na Aruba.
