Ayera mainta Aruba a celebra su 100 aña di aniversario di aviacion. Durante un ceremonia oficial cu a tuma luga diabierna dia 18 di augustus mainta den presencia di Minister di Transporte Ursell Arends y CEO di Aeropuerto di Aruba Joost Meijs conhuntamente cu demas invitado a devela un arte publico riba Linear Park, net dilanti di Aruba Bank Camacuri.

E obra di arte ta crea pa Gilbert Senchi. E obra tin un total di 10 meter di haltura y ta conmemora e aterisahe di e prome sea planes na Aruba dia 18 di augustus di aña 1923 y ta fungi como un milestone conmemorativo na honor di e 100 aña di aviacion na Aruba.

Durante e ceremonia di inauguracion a laga tur e invitadonan mira un video caminda a demostra e rikesa di historia di 100 aña di aviacion na Aruba, sigui pa e discursonan di CEO di Aeropuerto di Aruba Joost Meijs, Minister di Transporte Ursell Arends y Deputy Director di Department of Civil Aviation Aruba (DCA) Anthony Kirchner. E discursonan a reconoce e contribucion cu aviacion di Aruba tin pa comunidad y economia local, ademas di enfatisa riba e importancia di preserva e patrimonio aeronautico a traves di instalacion di e arte publico cu recientemente a inaugura.

Den su palabranan, minister di Turismo Dangui Oduber a expresa su gradicimento pa e sector di aviacion ya cu sin aviacion no ta existi turismo, ni economia y menos trabou, pa e motibo aki nan ta celebra na grandi unda e historia di 100 aña pasa a cuminsa cu e aterisahe di e prome avion y Aruba a bin experenciando e evolucion y desaroyo di turismo y aviacion.

“Aruba ta un di e paisnan rond di mundo mas exitoso pa loke ta trata turismo unda aeropuerto cu a cuminsa na Paardenbaai, Oranjestad, tambe a desaroya y a evoluciona cu un miyon di bishitante pa aña, Aruba ta conecta cu 35 destinacion na nivel mundial y e conectividad ey nos ofrece un plataforma mundial di conexion y p’esey Aruba ta hopi exitoso, mi ta cu gradici na tur ex-minister di Turismo y ex-directornan di aeropuerto, tur hende cu a traha den industria di turismo y aviacion pasobra danki na nan cu a laga un base nos ta cosechando awendia, ” minister Oduber a bisa.

Manera ta conoci den ultimo añanan aeropuerto Reina Beatrix ta bin renobando nan espacio y segun minister Oduber a sigura, esey ta bay continua na unda na e momentonan aki ta tumando luga e proyecto Gateway 2030 cu un inversion di 140 miyon dollar pa brinda un miho servicio na e bishitantenan, amplia e cantidad di gate cu ta existi debi cu awor ta existi e problema di hopi demanda y aeropuerto a bira chikito pa e cantidad di bishitantenan cu ta bin Aruba.

E prome fase di e proyecto aki ta plania pa keda cla otro aña pa asina continua cu e di dos fase y pa fin di aña 2025 e proyecto lo keda completo pa bira e miho aeropuerto den Caribe, segun loke minister Oduber a expresa.

Pa minister Oduber mester diversifica e mercado Mericano cu e mercado di mas grandi di Aruba pero tambe mester diversifica e mercado di Latino America na unda ya caba a cuminsa cu vuelonan di diferente parti di Colombia y awor ta den plannan un vuelo directo for di Brazil y Peru, cu ta destinacionnan atractivo y ta yuda cu e strategia cu nan kier implementa pa no depende solamente di e mercado Mericano.

Director adhunto di Departamento di Aviacion Civil a comenta cu e evento y e monumento inaugura ayera ta simbolisa e link entre aviacion cu arte, mas ainda ta representa, conmemora y marca historia di 100 aña di aviacion na Aruba.

“Ora ta papia di aviacion, nos ta pensa mesora riba avionnan cu ta yega y sali transportando personanan y carganan, principalmente turistanan pa Aruba cu ta hopi importante, durante e ultimo lunanan den cuadro di preparacion pa e celebracion di 100 aña di aviacion, nos tur por a nota e importancia di aviacion pa nos turismo y nos economia, sinembargo, mi kier a para keto un rato riba factor humano ta e construccion personal di instancianan, sea directamente of indirectamente na aviacion, mi kier gradici tur e personanan cu a aporta y esnan cu ta aportando, pa nan dedicacion y trabou duro pa nos por a celebra awe e 100 aña aki,” el a bisa.

Ademas, Ronella Croes ken ta fungi como CEO di ATA a comenta cu nan ta hopi orguyoso di por conmemora e 100 aña di aviacion na Aruba y a enfoca riba aviacion su importancia cu ta nifica hopi unda sigur esey a keda refleha den temporada di pandemia di Covid-19 un momento unico y historico caminda Aruba a cera su frontera y eynan por a realisa di e impacto berdadero.

Croes tambe a sigura cu Aruba ta bon ekipa cu asiento aereo di aerolineanan cu tin e confiansa den Aruba y esey tambe ta un refleho di un trabou hopi duro.

Pa Aruba por desaroya mas su turismo, segun Croes a señala ta cu mester haci hopi mas pa promove un desaroyo duradero y esey pa nan ta nifica cu tin un balans entre e contribucion economico pero tambe tin hopi mira y bista riba accionnan concreto cu ta contribui na e calidad di bida di e ciudadanonan como tambe mester tin balans di proteccion di naturalesa y medio ambiente y di ultimo, nan mester zorg tambe cu e bishitante como experiencia, e puntonan aki ta describi con pa nan kiermen un turismo duradero y tin hopi otro cos cu ta haciendo y cu mester sigui haci pa duna realse na esey, “mi ta kere esey e comunidad ta espera di nos tambe”, Croes a sigura.

Riba rednan social, ATA a señala cu nan ta orguyoso di por ta parti di e historia di aviacion di Aruba y seguramente di por a contribui na realisacion di e monumento di arte aki, un otro obra fantastico di e gran artista Gilbert Senchi. Senchi tabata ocupa riba e obra aki durante seis luna, trahando e modelo y dunando forma na e materialnan di brons y hero pa e obra di arte di 10 meter di haltura, tur esaki a sosode na su tayer di arte situa na Colombia. Despues el a welder y compila e structura di 4.000 kilogram den un tayer local na San Nicolas. E haltura di e obra di arte ta representa 10 decada di e historia di aviacion na Aruba, mientras cu e estatua di hero den forma di e rabo di un avion ta representa e futuro di aviacion y e replica di brons di e avion Curtiss- H16 riba e structura ta rindi homenahe na e prome aterisahe na Aruba cu a sosode 100 aña pasa.

E develacion oficial di e obra di arte tabata den man di Minister di Finanzas y Cultura Xiomara Maduro, Minister di Turismo y Salud Publico Dangui Oduber, Minister di Transporte, Integridad, Naturalesa y Asuntonan di Adulto Mayor Ursell Arends, Anthony Kirchner, Joost Meijs y e sponsornan cu a haci esaki posibel. E instalacion di e arte ta un regalo pa comunidad di Aruba y ta posibel danki na Aruba Airport Authority cu colaboracion di Gobierno di Aruba, AHATA, ANSA, ATA, De Wit Stores N.V., Dufry Aruba N.V., y One Happy Bar N.V. Despues cu a termina cu e ceremonia, a yama tur e empleadonan di AAA pa bin dilanti di e obra di arte pa saca un potret conmemorativo, tur e trahadonan di AAA tabata bisti cu un polo special pa e ocasion di celebracion di 100 aña di aviacion.

Un grupo chikito di mandatario, sponsor y invitado a reuni na Linear Park cerca di e luga caminda a construi e prome sitio di aterisahe oficial na aña 1935. Den e area aki, cu antes tabata yama Baca Morto, por topa cu e obra di arte net memey caminda tur hende por pasa mira.