E evaluacion nacional di riesgo di Financiamento di Terorismo (TF) y Financiamento di Proliferacion (PF), comisiona pa e National AML/CFT Comite Directivo, a keda completa recientemente.

E motodo y instrumentonan desaroya pa e Banco Mundial a keda aplica pa hiba e evaluacion, no solamente den cumplimento cu e recomendacionnan di FATF, pero tambe den preparacion pa e evaluacion di CFATF pa e eficiencia di Aruba su AML/CFT marco di referencia cu lo tuma luga den e tercer kwartaal di 2021.

Te cu fecha di awe, Aruba no a yega di tin acusacion of sentencia en conexion cu financiamento di terorismo of financiamento di proliferacion. P’esey mes, e evaluacion di riesgo di TF y PF a wordo haci a base di mas tanto rapport di transaccionnan inusual (UTR’s) presenta pa e FIU, informacion inteligente, informacion di e oficina di fiscal publico, informacion di fuente publico, categorianan regional di TF/PF y opinionnan experto. Debilidadnan of buraconan den e defensa di Aruba contra TF y PF (vulnerabilidadnan) a wordo identifica door di evalua e calidad di legislacion, e calidad di inteligencia, e efectividad di reportenan di transaccionnan inusual, monitoreo y analisis, e adaptacion di recursonan, e efectividad di cooperacion internacional, conocimiento y compromiso pa bringa TF y PF, e calidad di supervision y e vulnerabilidad di e organisacionnan no lucrativo di Aruba pa wordo usa pa TF.

Prome Minister como presidente di Comite Directivo Nacional AML/CFT a aproba e rapport TF/PF di NRA riba 10 di juni 2021. E recomendacionnan inclui den e rapport ta tuma na cuenta e ambiente economico y geografico, su marco di referencia legal y hudicial, como tambe tendencianan criminal potencial of emergente. Pa motibo di informacion inteligente den e rapport TF/PF di NRA, e rapport ta wordo clasifica como estrictamente confidencial. Por lo tanto, solamente e conclusionnan general lo ordo comparti cu e publico via e comunicado di prensa.

Resultadonan di calificacion di NRA di TF/PF

Un menasa general di financiamento di terorismo cu un calificacion mediano/abou, hunto cu un calificacion general mediano pa e vulnerabilidad pa financiamento di terorismo, a hiba na un calificacion mediano di e evaluacion general di financiamento di terorismo pa Aruba. E calificacion mediano di e evaluacion ta principalmente atribui na deficiencianan den e marco di referencia legislativo di Aruba den relacion cu TF, e necesidad pa mehora e conocemento y compromiso pa medio di autoridadnan relevante pa combati TF, y e ausencia di supervision efectivo (basa den riesgo) y monitoreo di e sector NPO pa preveni TF.

Un menasa general di financiamento di proliferacion cu un calificacion abou, hunto cu un calificacion general halto pa e vulnerabilidad pa financiamento di proliferación, a hiba na un calificacion mediano pa e evaulacion general di financiamento di proliferacion pa Aruba. E calificacion mediano di e evaluacion ta principalmente atribui na deficiencianan den e marco di referencia legislativo di Aruba den relacion cu PF, poco conocemento den e sector publico y priva di e indicadornan di bandera cora di PF y e ausencia di controlnan suavisante, y e necesidad pa mehora cooperacion nacional y coordinacion entre autoridadnan competente pa preveni y combati PF.

A pesar di e nivel di menasa abou pa PF na Aruba, e exposicion di e sistema financiero ora di haci negoshi den e mercado financiero internacional ta planta riesgo pa PF. Ta importante pa neutralisa e riesgonan ey pa PF den bista de potencial pa impacto severo.

Resultadonan Clave

Menasa di terorismo

E nivel actual di menasa di terorismo na Aruba ta abou. Te cu e fecha di awe, ningun atake terorista a yega di pasa na Aruba, y ningun grupo di conoci (local of stranhero), of celulanan terorista (local of stranhero) ta actualmente activo na Aruba. Adicionalmente, ningun grupo terorista of ningun celula terorista a wordo designa bou di e Decreto di Sancionnan pa Combati Terorismo y Financiamento di Terorismo (AB 2010 no 27).

Aunke Aruba no tin ningun historia di atakenan terorista, atakenan terorista den futuro no por wordo exclui completamente. E menasa di terorismo pa Aruba ta bini principalmente di gruponan terorista regional of global como tambe di personanan cu ta wordo influencia pa e ideologia global jihad cu ta actua posiblemente nan so.

Riesgo di financiamento di terorismo

Durante e periodo bou revision (2013-2018), 11 caso a keda designa pa e FIU como posiblemente relaciona na financiamento di terorismo y despues a keda difundi pa autoridadnan policial. E transaccionnan oculto a mustra algun señal di alerta y categoria cu ta wordo reconoci mundialmente como potencialmente relaciona cu financiamento di terorismo. Sinembargo, despues di mas investigacion e autoridadnan competente a conclui cu ningun di e transaccionnan tabata vincula na financiamento di terorismo.

Aruba su ubicacion geografico ta hacie obhetivo pa menasa di financiamento di terorismo procedente di e posibilidad cu e sistema financiero di Aruba por wordo mal usa pa gruponan terorista pa laba placa ilicito obteni pa bentana di cocaina na Sur America. E ingresonan di e benta aki, por wordo usa pa financiamento di terorismo.

Riesgo di Financiamento di Proliferacion

Aruba no ta wordo considera como hurisdiccion cu ta fabrica arma of un centro di comercio internacional pa e proliferacion di bienes. Ni un indicacion di menasa di financiamento di proliferacion a ser haya procedente di e region of localmente. Debi na su ubicacion geografico, Aruba por wordo considera un centro di transito pa bienes di dobel uso, articulonan sensible pa proliferacion of articulonan militar.

Paso Aruba tin un sector di finanzas solido y confiabel, e menasa di financiamento di proliferacion ta bini mas tanto di e posibilidad cu Aruba su sistema financiero por word mal usa pa laba placa ilicito, cu despues por wordo usa pa financiamento di proliferacion di arma di destruccion masal.

Accionnan di Siguimento

E gobierno di Aruba ta den proceso di diseña un strategia AML/CFT/CFP detaya pa suavisa e riesgonan identifica den ordo di prioridad. E intencion ta pa ripiti e TF/PF NRA cada cinco aña. Sinembargo, si cierto desaroyonan ta provoca un necesidad pa evaluacion trempan na un nivel nacional, un evaluacion asina lo wordo haci rapidamente.