Desde algun tempo, Bon Dia Aruba ta dedica hopi atencion na trabao di diferente fundacion cu ta activo, entre otro riba tereno social, pa un gama amplio di grupo cu nan ta atende. Ta trata di trabao pa hubentud en general, hende cu cierto discapacidad fisico o di otro indole, orienta riba hende di edad avansa, etc. Ainda nos a cubri un parti chikito di loke segun nos tin disponible na organisacionnan cu ta contribui nan parti na bienestar di Aruba, cu un aporte riba un tereno specifico. Hopi biaha nan trabao no ta haya e atencion cu e ta merece, pero esey por ta debi na varios factor, tambe dependiendo di e esfuerso cu nan mes ta hinca den propaga informacion tocante nan labor. En todo caso, nos corant ta haciendo un esfuerso pa trece e trabao mas den luz publico, pa comunidad ta miho na altura kico e organisacionnan aki ta haci.

Naturalmente den tur esaki nos no ta bay discuti ken ta merece mas apoyo; nos ta solamente ofrece un platform pa duna comunidad mas informacion. Den tur esey ta parce nos cu en general e recaudacion di fondo ta keda un tema di preocupacion pa hopi di nan, si no ta tur. Tin fundacion cu ta conta cu subsidio, amplio o masha modesto den otro caso, di banda gubernamental. Manera semper, cu e ambicion cu un organisacion sano lo tin, mas financiamento pa e plannan cu nan tin semper lo ta bonbini. Aki den sentido general nos tin un preocupacion. No por spera milagro di banda di gobierno, y esaki pa basta aña, mirando e situacion financiero den e proximo dos decada. Di mes e sector subsidia ta un factor di importancia riba presupuesto di nos pais, unda solamente e gastonan di salario di e sector subsidia ta core ultimo añanan den careda di 160 miyon florin. Hunto cu e gastonan di personal di gobierno mes nos ta mira un payroll total cu ta riba 700 miyon florin pa aña, mas di mita di e presupuesto di gobierno.

Esey ta implica cu lo mester contempla haya mas fondo for di den comunidad mes, tanto di e ciudadano individual como di sector comercial. Sin embargo, nos economia di berdad no ta den tempo di bonanza. Gastonan empresarial ta subiendo constantemente, sin cu ta mira tanto esfuerso pa haci inversion na nos isla mas atractivo. E ultimo medidanan, manera e peso extra cu ta poniendo riba empresanan a traves di e aumento di grondbelasting, ta pisa net riba e budget di  e empresanan di mas tamaño, cu hopi biaha pa esnan cu kier recauda fondo, ta casi e prome adres cu ta bin na mente ora ta trata di busca patrocinio. Mayoria di e empresanan grandi ta traha di un forma structura pa por atende e fluho grandi di peticion cu nan ta haya, no solamente di e sector social sino tambe di deporte, cu realmente no por depende solamente riba e aporte di e fundacion lanta pa gobierno pa a traves di loteria satisface e necesidadnan di deporte, loke ‘by far’ no ta e caso. Un parti considerable di e financiamento di deporte tambe ta bin di donacion di sector priva.

Aki ta necesario señala otro problema, y esey ta cu varios aña pasa caba gobierno a limita e sumanan cu un empresa por contribui como donacion, tanto pa meta caritativo como pa deporte, cu por deduci di belasting. E tempo ey no tabatin  mucho apoyo pa e sector deportivo cu a keha riba esaki. Talvez cu na e momento aki, en vista di e incapacidad di gobierno pa aporta mas na e sector social y na deporte, pa considera amplia e suma cu empresa por duna pa e metanan aki. Naturalmente cu esaki tambe ta haci cu menos placa ta bay drenta den caha di gobierno, y cu esey lo ta e contesta tambe di e mandatario concerni.

Di otro banda, y den esey nos tin admiracion pa nan, nos ta mira cu ta bin iniciativa di den comunidad mes, por ehemplo di nos deportistanan, pa logra algo extraordinario, cu e meta di recauda fondo pa un iniciativa caritativo. Asina un grupo di cinco landador a logra ripiti e hazaña di tanto aña pasa di Roly Bisslik, di crusa di costa firme pa Aruba, pa recauda fondo pa labor di Wilhelmina Kankerfonds. Y recientemente, fin di siman pasa, atleta Shariska Winterdaal a subi su bicicleta pa haci un recorido di 500 kilometro riba nos isla. Cu esaki el a gana respet di tur  atleta na Aruba, cu sa kico ta significa haci algo asina, ademas di e preparacion inmenso cu esaki ta envolve. Pero tambe e lo a gana e respet den comunidad pasobra e no a hacie pa bira mas conoci como persona, sino pa yuda otro hende.

Kico nos kier bisa cu tur esaki? Cu nos ta convenci cu nos tin hopi hende cu ta consciente di e tempo den cual nos ta bibando y e retonan cu nos comunidad ta topa y lo sigui topa riba su caminda. Y cu nan ta dispuesto pa ‘step up to the plate’ y haci loke mester haci.